Surxondaryo viloyatida infratuzilmani yaxshilash uchun 1,9 trillion so‘m ajratiladi. Bu haqda ayni vaqtda viloyat jamoatchilik vakillari, vazirlik va idoralar rahbarlari bilan o‘tkazilayotgan yig‘ilishda Prezident Shavkat Mirziyoyev ma’lum qildi, deb xabar beradi Telegram’dagi “Mikrofon ko‘targan ayol” kanali.

Foto: “Daryo” / Madina Nurman

“Do‘st bo‘lsangiz, muammolarni aytinglar. Biz ularni eshitib, hal qilgani kelganmiz. Janob Prezident bugun shu masalani hal qilib bering, xalqimizga qiyin desangiz, biz shunga e’tibor qilamiz. Albatta, hammasini birdaniga hal qilish qiyin, ammo birinchi navbatda ko‘rib chiqamiz, yechimini topamiz. Surxondaryo viloyatida infratuzilmani yaxshilash uchun 1 trillion 900 milliard so‘m mablag‘ ajratilyapti. Deputatlar qayerga yo‘l, qayerga bog‘cha bo‘yicha aniq takliflar bilan chiqsin”, — deydi davlat rahbari mahalliy kengash deputatlariga qarata.

Shuningdek, Prezident Shavkat Mirziyoyev 4 ta sektor rahbarlarining odamlar oldidagi mas’uliyatini oshirish haqida so‘zlagan.

“Sizlar o‘z hududingizdagi muammoni bilmaysizmi? Dod deganlarning uyiga boringlar, yaxshidan ko‘ra, yomonning uyiga boringlar, ularning tilidan eshitinglar, ko‘ringlar va ular tushunadigan tilda gapiringlar. Kabinetga qorovullik qilish o‘rniga odamlar oldiga, uyiga borib muammolarni hal qilish kerak. Yoshlar, xotin-qizlar, temir daftar bo‘yicha ishlash kerak”, — deya ta’kidlaydi davlat rahbari.

Shavkat Mirziyoyev hududlar iqtisodiyoti, aholi turmush sharoitlari bilan yaqindan tanishish maqsadida 1-iyun kuni Surxondaryo viloyatiga jo‘nab ketgandi.