O‘zbekiston Tashqi ishlar vazirligi polshalik jurnalist Agneshka Pikuliskaning akkreditatsiyasini uzaytirmaslikka qaror qildi. Bu haqda TIV matbuot kotibi Yusuf Qobuljonov xabar berdi.
“Al Jazeera telekanali muxbiri A.Pikuliska-Vilchevska tomonidan O‘zbekiston qonunchiligining buzilishi holatlari qayd etilgani sababli Tashqi ishlar vazirligi uning akkreditatsiyasini uzaytirmaslik to‘g‘risida qaror qabul qildi”, — deyiladi xabarda.
Eslatib o‘tamiz, 1-fevral kuni polshalik jurnalist Agneshka Pikulitska Rustam ismli TIV xodimi unga tegajog‘lik qilganini, shuningdek, anchadan buyon TIVda akkreditatsiya ololmayotganini ma’lum qilgandi. TIV bunga 2-fevral kuni munosabat bildirib, polshalik jurnalistdan uzr so‘radi va unga tegajog‘lik qilgan xodimini ishdan bo‘shatganini ma’lum qildi, 3-fevral kuni esa unga akkreditatsiya berdi.
Aprel oyida esa IIV Agneshka Pikuliskani so‘nggi vaqtlarda sodir bo‘layotgan voqealarni noto‘g‘ri talqin qilishda va huquqni muhofaza qilish idoralarini obro‘sizlantiradigan ma’lumotlarni nashr etishda ayblagan edi.
Izoh (0)