Президент Шавкат Мирзиёев айни пайтда Сурхондарё вилояти фаоллари билан ўтказилаётган йиғилишда депутатларни фаол бўлишга чақирди, дея хабар бермоқда «Дарё» мухбири.
«Охирги йилларда туман кенгашларига кўп ваколатлар бердик. Ким у туман кенгаши? Халқ вакили! Халқ вакили ким? Ўша ҳудуддаги халқ дарди билан яшаган, муаммоларга бефарқ бўлмаган, фидойи, депутат сифатида кенгашга сайланган одам»,— деди Президент.
Давлат раҳбари вилоятни янада ривожлантириш учун давлат бюджетидан 1,9 триллион сўм ажратилганини таъкидлаганди.
«Сурхондарёнинг энг олис ҳудудларидаги вазиятни ўзим яхши биламан. Кўмак нуқтаи назардан жуда катта маблағ билан келдик. Бу кичкина маблағ эмас. Қани жамоатчилик, қани депутатлар? Нима учун вилоятга 1,9 триллион сўм пул беряпмиз? Ижтимоий соҳага, йўлларга, узоқ жойларга 20 йил давомида бунча пул ажратмаганмиз. Назорати қани? Депутатларнинг овози қани? Сиёсатни ким амалга оширади? Халқ вакили бўлган сиз депутатлар амалга оширасизлар. Туман ҳокимлари, сектор раҳбарлари, маҳалла раислари, депутатлар ўзини қийнаши керак. Агар қийнай олмаса, кетиши керак. Ёш, забардаст, фидойи, билимли кадрлар кириб келиши керак», — деди Шавкат Мирзиёев.
Эслатиб ўтамиз, Шавкат Мирзиёев ҳудудлар иқтисодиёти, аҳоли турмуш шароитлари билан яқиндан танишиш мақсадида 1 июндан буён Сурхондарё вилоятида бўлиб турибди. Давлат раҳбари вилоятга ташрифини Шеробод туманидан бошлаб, тумандаги қуёш фотоэлектр станцияси қуриладиган майдонга борди, замонавий иссиқхона ва анор қадоқлаш корхонаси билан танишди. Ангор туманидаги «Ангор Сурхон ғурури» кластерида бўлиб, ғалла ва ғўза ривожини кўздан кечирди. Шунингдек, Термиздаги янгиланган «Айритом» чегара божхона постини бориб кўрди, Термиз халқаро савдо маркази бош режаси билан танишди.
Изоҳ (0)