Prezident Shavkat Mirziyoyev Surxondaryoning qator tumanlarda ochiladigan yangi tadbirkorlik subyektlarini soliqlardan ozod etish taklifini bildirdi. Bu haqda Telegram’dagi “Mikrofon ko‘targan ayol” kanali xabar berdi.
Ma’lum qilinishicha, Shavkat Mirziyoyev Bandixon, Qiziriq, Muzrabot va Sherobod tumanlarida ochiladigan yangi tadbirkorlik subyektlarini yer, mol-mulk, kichik korxona aylanmasidan olinadigan soliqlar, yakka tartibdagi tadbirkorlarning qat’iy miqdordagi daromad solig‘idan 2024-yil 1-yanvarga qadar ozod etishni taklif qilgan.
Bundan tashqari, viloyatdagi tog‘li va sho‘r yerlarda yangidan tashkil etiladigan tadbirkorlik subyektlarini ham 2024-yil 1-yanvarga qadar yuqoridagi soliqlardan ozod qilish hamda foyda solig‘i stavkasini ikki barobarga kamaytirish kutilmoqda.
Davlat rahbari bosh vazir o‘rinbosarlari — Jamshid Qo‘chqorov, Sardor Umurzoqov, viloyat hokimi To‘ra Bobolovga bir oy muddatda ushbu imtiyozlar bo‘yicha Soliq kodeksiga tegishli qo‘shimchalar kiritish va ularni 1-iyuldan qo‘llash to‘g‘risidagi qonun loyihasini ishlab chiqish haqida topshiriq bergan.
Izoh (0)