Qashqadaryo viloyati hokimi Zoir Mirzayevning ijtimoiy sohaga mas’ul o‘rinbosari Rustam Yo‘ldoshev uch oylik maoshini davlatga qaytarishi mumkin. Bu haqda “Daryo”ga xabar bergan Ahror Sodiqovning aytishicha, viloyat hokimi Zoir Mirzayevning maktabgacha ta’lim tashkiloti faoliyatiga bag‘ishlangan tanqidiy yig‘ilishida bu haqda so‘z borgan.
Zoir Mirzayevning matbuot kotibiga ko‘ra, hokim o‘rinbosari Rustam Yo‘ldoshevning maktabgacha ta’lim faoliyatiga bag‘ishlangan yig‘ilishga yetarli darajada tayyorgarlik ko‘rmaganidan ranjigan.
“Yig‘ishdan ko‘pchilik xabardor qilinmagan. Hamma tumanda qaysidir mas’ullar qolib ketgan yoki qaysidir mas’ul ishi muhokama qilinishini bilib, ataylab yig‘ilishga kelmagan”, — deydi Ahror Sodiqov Rustam Yo‘ldoshevning jazolanishini izohlar ekan.
Ta‘kidlash lozimki, Mehnat kodeksining 164-moddasi (mehnat haqidan ushlab qolish)ga ko‘ra, xodimning mehnat haqi uning yozma roziligi bilan, bunday rozilik bo‘lmagan taqdirda esa sud qaroriga asosan ushlab qolinishi mumkin.
Kodeksga ko‘ra, xodimning roziligidan qat’i nazar, ham quyidagi hollarda mehnat haqidan ushlab qolish mumkin.
1) belgilangan soliqlar va boshqa majburiy to‘lovlarni undirish uchun;
2) sudning qarorlari va boshqa ijro hujjatlarini ijro etish uchun;
3) ish haqi hisobiga berilgan avansni ushlab qolish uchun, xo‘jalik ehtiyojlariga, xizmat safarlariga yoki boshqa joydagi ishga o‘tganligi munosabati bilan berilgan bo‘lib, sarf qilinmay qolgan va o‘z vaqtida qaytarilmagan avansni ushlab qolish uchun hamda hisob-kitobdagi xatolar natijasida ortiqcha to‘langan summani qaytarib olish uchun.
Bunday hollarda ish beruvchi avansni qaytarish yoki qarzni to‘lash uchun belgilangan muddat tamom bo‘lgan kundan yoxud haq to‘lash noto‘g‘ri hisoblab chiqarilgan kundan boshlab bir oydan kechiktirmasdan avans yoki qarzni ushlab qolish haqida farmoyish berishga haqlidir. Agar bu muddat o‘tib ketgan bo‘lsa yoki xodim xo‘jalik ehtiyojlariga, xizmat safarlariga yoxud boshqa joydagi ishga o‘tganligi munosabati bilan berilgan avansning ushlab qolinishini asossiz yoki miqdorini noto‘g‘ri deb hisoblasa, u holda qarz sud tartibida undiriladi;
4) hisobidan xodim ta’til olib bo‘lgan ish yili tugamasdan turib mehnat shartnomasi bekor qilinganda — ta’tilning ishlanmagan davrga tegishli kunlari uchun.
5) xodim tomonidan ish beruvchiga yetkazilgan zararni qoplash uchun, agar yetkazilgan zararning miqdori xodimning o‘rtacha oylik ish haqidan ortiq bo‘lmasa;
6) ushbu kodeksning 181-moddasi birinchi qismining 2-bandida nazarda tutilgan jarimani undirish uchun.
Izoh (0)