Зоир Мирзаевнинг ижтимоий соҳага масъул ўринбосари 3 ойлик иш ҳақини давлатга қайтариши мумкин

Қашқадарё вилояти ҳокими Зоир Мирзаевнинг ижтимоий соҳага масъул ўринбосари Рустам Йўлдошев уч ойлик маошини давлатга қайтариши мумкин. Бу ҳақда «Дарё»га хабар берган Аҳрор Содиқовнинг айтишича, вилоят ҳокими Зоир Мирзаевнинг мактабгача таълим ташкилоти фаолиятига бағишланган танқидий йиғилишида бу ҳақда сўз борган.

Зоир Мирзаевнинг матбуот котибига кўра, ҳоким ўринбосари Рустам Йўлдошевнинг мактабгача таълим фаолиятига бағишланган йиғилишга етарли даражада тайёргарлик кўрмаганидан ранжиган.

«Йиғишдан кўпчилик хабардор қилинмаган. Ҳамма туманда қайсидир масъуллар қолиб кетган ёки қайсидир масъул иши муҳокама қилинишини билиб, атайлаб йиғилишга келмаган», — дейди Аҳрор Содиқов Рустам Йўлдошевнинг жазоланишини изоҳлар экан.

Таъкидлаш лозимки, Меҳнат кодексининг 164-моддаси (меҳнат ҳақидан ушлаб қолиш)га кўра, ходимнинг меҳнат ҳақи унинг ёзма розилиги билан, бундай розилик бўлмаган тақдирда эса суд қарорига асосан ушлаб қолиниши мумкин.

Кодексга кўра, ходимнинг розилигидан қатъи назар, ҳам қуйидаги ҳолларда меҳнат ҳақидан ушлаб қолиш мумкин.

1) белгиланган солиқлар ва бошқа мажбурий тўловларни ундириш учун;

2) суднинг қарорлари ва бошқа ижро ҳужжатларини ижро этиш учун;

3) иш ҳақи ҳисобига берилган авансни ушлаб қолиш учун, хўжалик эҳтиёжларига, хизмат сафарларига ёки бошқа жойдаги ишга ўтганлиги муносабати билан берилган бўлиб, сарф қилинмай қолган ва ўз вақтида қайтарилмаган авансни ушлаб қолиш учун ҳамда ҳисоб-китобдаги хатолар натижасида ортиқча тўланган суммани қайтариб олиш учун.

Бундай ҳолларда иш берувчи авансни қайтариш ёки қарзни тўлаш учун белгиланган муддат тамом бўлган кундан ёхуд ҳақ тўлаш нотўғри ҳисоблаб чиқарилган кундан бошлаб бир ойдан кечиктирмасдан аванс ёки қарзни ушлаб қолиш ҳақида фармойиш беришга ҳақлидир. Агар бу муддат ўтиб кетган бўлса ёки ходим хўжалик эҳтиёжларига, хизмат сафарларига ёхуд бошқа жойдаги ишга ўтганлиги муносабати билан берилган аванснинг ушлаб қолинишини асоссиз ёки миқдорини нотўғри деб ҳисобласа, у ҳолда қарз суд тартибида ундирилади;

4) ҳисобидан ходим таътил олиб бўлган иш йили тугамасдан туриб меҳнат шартномаси бекор қилинганда — таътилнинг ишланмаган даврга тегишли кунлари учун.

5) ходим томонидан иш берувчига етказилган зарарни қоплаш учун, агар етказилган зарарнинг миқдори ходимнинг ўртача ойлик иш ҳақидан ортиқ бўлмаса;

6) ушбу кодекснинг 181-моддаси биринчи қисмининг 2-бандида назарда тутилган жаримани ундириш учун.