O‘zbekistonda endilikda hayvonlarga nisbatan shafqatsiz munosabatda bo‘lganlik uchun nafaqat jarima belgilanishi, balki ozodlikdan mahrum etish jazosi tayinlanishi ham mumkin. Oliy Majlis Senati 28—29-may kunlari bo‘lib o‘tgan navbatdagi yalpi majlisida bu boradagi qonunchilikka tegishli o‘zgartirishlarni kiritishni ma’qulladi, deb xabar beradi “Gazeta.uz”.
Ma’muriy javobgarlik to‘g‘risidagi kodeksning 111-moddasi (hayvonlarga nisbatan shafqatsiz munosabatda bo‘lish) bo‘yicha belgilanadigan jazolar kuchaytirilmoqda:
“Hayvonlarga nisbatan shafqatsiz munosabatda bo‘lish ularning o‘limiga yoxud mayib bo‘lishiga olib kelsa, xuddi shuningdek hayvonlarni qiynash — bazaviy hisoblash miqdorining 3 baravaridan (735 ming so‘m) 5 baravarigacha (1,225 million so‘m) jarima belgilanishiga sabab bo‘ladi.
Xuddi shunday huquqbuzarlik ma’muriy jazo chorasi qo‘llanilganidan keyin bir yil davomida takror sodir etilgan bo‘lsa yoxud ushbu moddaning birinchi qismida nazarda tutilgan huquqbuzarlik voyaga yetmagan shaxs hozirligida sodir etilgan bo‘lsa — BHMning 5 baravaridan 10 baravarigacha jarima yoki 15 sutkagacha ma’muriy qamoq jazosi belgilanishiga sabab bo‘ladi”.
Senat tomonidan ma’qullangan o‘zgartirishlarga ko‘ra, Jinoyat kodeksiga yangi 202-1 moddasi (hayvonlarga nisbatan shafqatsiz munosabatda bo‘lish) kiritilmoqda:
“Hayvonlarga nisbatan shafqatsiz, ya’ni ularni qiynash yoki g‘arazli yoki boshqa sabablarga ko‘ra jarohatlash orqali ularning o‘limi yoki mayib bo‘lishiga olib kelish holati xuddi shu kabi harakat uchun ma’muriy javobgarlik belgilanganidan keyin ham sodir etilgan taqdirda — BHMning 25 baravaridan (6,125 million so‘m) 50 baravariga (12,25 million so‘m) qadar jarima yoki 240 soatgacha majburiy jamoatchilik yoki 1 yilgacha axloq tuzatish ishlariga jalb etish yoki 6 oygacha ozodlikni cheklash yoxud 6 oygacha ozodlikdan mahrum etish jazosi tayinlanishiga sabab bo‘ladi”.
Mavzuga doir:
Izoh (0)