Toshkentda Lacetti piyodalar yo‘lagini kesib o‘tayotgan fuqaroni urib yubordi. Jabrlanuvchi 6 kun o‘tib shifoxonada vafot etdi

Toshkent shahar Yangihayot tumanida Lacetti piyodalar yo‘lini kesib o‘tayotgan fuqaroni urib yubordi, deya xabar bermoqda Toshkent shahar IIBB.

Qayd etilishicha, 2021-yil 21-may kuni, taxminan, soat 20:00 da Yangihayot tumani Binokor ko‘chasida Lacetti avtomobilini (davlat raqami 01 751 AHA) boshqarib borgan 1967-yilda tug‘ilgan S.S. tartibga solinmagan piyodalar o‘tish joyidan yo‘lni kesib o‘tmoqchi bo‘lgan piyodani urib yuborgan.

YTH natijasida piyoda – 1966-yilda tug‘ilgan A.B. badan shikastlari bilan shifoxonaga yetkazilgan.

2021-yilning 27-may kuni tibbiyot xodimlarining sa’y-harakatlariga qaramasdan A.B. hayotdan ko‘z yumgan.

Toshkent shahar IIBB tergov boshqarmasi tomonidan mazkur fakt bo‘yicha Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish qoidalarini buzish) bilan jinoyat ishi qo‘zg‘atilgan. Hozirda tergov olib borilmoqda.

Bundan avval Toshkentda ikki avtobus ishtirokida sodir bo‘lgan YTH oqibatida bir piyoda halok bo‘lgani, Farg‘onada bir haftada YTHlar oqibatida 20 kishi halok bo‘lgani hamda Samarqandda piyodalar yo‘lagidan o‘tayotgan 24 yoshli yigit yuk mashinasi urib yuborishi oqibatida halok bo‘lgani haqida xabar berilgandi.