Ko‘xna qit’aning eng nufuzli musobaqasi Yevropa chempionati boshlanishiga ham tobora kam vaqt qolmoqda. Unda ishtirok etadigan aksariyat terma jamoalar musobaqa uchun qaydnomalar va kengaytirilgan tarkiblarni e’lon qilib ulgurdi. Bu xabarlardan so‘ng ko‘plab yulduzlarning Yevroda ishtirok eta olmasligi oydinlashdi. Ularning aksariyatiga futbolchilarning azaliy dushmani – jarohatlar to‘sqinlik qilmoqda. Demak, quyida jarohat sabab Yevro–2020 ni o‘tkazib yuboradigan mashhur futbolchilar haqida fikr yuritiladi.
Mark-Andre ter Shtegen – Germaniya terma jamoasi darvozaboni
Ter Shtegen yaqinlashib kelayotgan Yevropa chempionatini o‘tkazib yuborishi haqida o‘zi ma’lumot berdi. Darvozabon Instagram sahifasida shunday yozadi: “Klub tibbiyot xodimlari bilan birgalikda qo‘shimcha operatsiya o‘tkazishga qaror qildik. Yevro—2020 ni o‘tkazib yuborishimdan afsusdaman. Ko‘p yillar davomida birinchi marta o‘z uyimdan turib, vatanim jamoasini qo‘llab-quvvatlayman. Musobaqada g‘alaba qozonamiz degan umiddaman”.
Ter Shtegen 20-may kuni operatsiya stoliga yotdi va tizzasidan muvaffaqiyatli operatsiya qilindi. Biroq uning yo‘qligi Germaniya terma jamoasiga ortiqcha muammo tug‘dirmasa kerak, boisi tarkibda Manuel Noyer va Bernard Leno kabi yetuk posbonlar bor.
Virjil van Deyk – Niderlandiya terma jamoasi himoyachisi
“Liverpul” himoyachisi 2020-yilning oktabrida APL doirasida o‘tkazilgan “Everton”ga qarshi o‘yinda jiddiy jarohat olib, safdan chiqqandi. Bungacha u atigi beshta o‘yin o‘tkazgandi. Van Deyk hamon tiklanish jarayonini davom ettirmoqda va Yevro–2020 da Niderlandiya terma jamoasiga yordam berma olmasligini aytdi.
“Jarohatdan so‘ng men uzoq yo‘lni bosib o‘tdim. Hozircha hamma narsa yaxshi ketmoqda. Yaqinda jiddiy qarorni qabul qildim. Yevroga bormasligim va mavsumlar oralig‘ida yakuniy tiklanish bosqichini o‘tkazishim to‘g‘ri bo‘ladi deb o‘ylayman. Mavsumoldi tayyorgarlik bosqichida safga qaytishni maqsad qilganman. Albatta, Yevropa chempionatida o‘ynamayotganimdan qayg‘udaman, ammo men va barcha hozirgi vaziyatni qabul qilishimiz kerak”, – deydi himoyachi.
Ansu Fati – Ispaniya terma jamoasi yarim himoyachisi
“Barselona” yarim himoyachisining yana bir marta operatsiyaga muhtojligi haqida uzoq vaqt davomida gapirildi. 2020-yilning noyabr oyida “Betis”ga qarshi o‘yinda Ansu Fati tizzasidan og‘ir jarohat oldi. Dastlab uning to‘rt oy muddatga safdan chiqqani aytildi. Biroq u hamon maydonga qaytmadi, yarim himoyachining tezroq tiklanishi uchun amalga oshirilgan barcha protseduralar behuda ketmoqda. Endi Fati tizzasini qayta operatsiya qildirishga va Yevropa chempionatini o‘tkazib yuborishga majbur bo‘ladi.
Zlatan Ibrahimovich – Shvetsiya terma jamoasi hujumchisi
Ortda qolgan 2020/21-yilgi mavsumda ham Ibra yana bir bor raqiblarini gollari bilan ranjitdi, shuningdek, o‘zi ham jarohatlar tufayli yaxshigina qiynaldi. Zlatan turli darajadagi jarohatlar va koronavirus tufayli A Seriyaning 17 uchrashuvini o‘tkazib yubordi. Shunga qaramay, forvard “Milan”ga juda katta foyda keltirdi deb aytish mumkin – 19 uchrashuvda 15 gol va 2 ta golli uzatma. Va bu orqali u 2016-yildan keyin ilk marta mamlakat bosh jamoasiga chaqirildi. Murabbiylar undan Yevropa chempionatida foydalanishni maqsad qilgandi.
Ammo mavsumning so‘nggi qismida tizzasidan olgan jarohati unga qimmatga tushdi. Shvetsiya terma jamoasi bosh murabbiyi Yanne Andersson Zlatanning musobaqada jamoaga yordam bera olmasligini ma’lum qildi.
“Zlatan jarohati Yevroda qatnashishiga yo‘l qo‘ymasligini aytdi. Albatta, bu Ibrahimovich uchun ham, biz uchun ham qayg‘uli yangilik. Umid qilamanki, u tez orada maydonga qaytadi”, – deydi murabbiy.
Hozir Ibrahimovich 39 yoshda, bundan keyin u yana terma jamoaga chaqiriladi deb hech kim kafolat bera olmaydi.
Marko Roys – Germaniya terma jamoasi yarim himoyachisi
Roys ham Yevro–2020 da qatnashmaydi, bu haqida uning o‘zi ma’lum qildi. “Murakkab, holdan toydirgan va baxtimizga, omadli o‘tgan mavsumdan so‘ng Yoaxim Lyov bilan Yevropa chempionatiga bormaslikka qaror qildik. Bu qaror men uchun juda qiyin bo‘ldi, chunki men doimo o‘z mamlakatim uchun o‘ynashdan xursand bo‘lib kelganman. Ammo qiyin o‘tgan bir yildan so‘ng tanamga tiklanish uchun vaqt berishga qaror qildim. Tanaffusdan foydalanib, yangi mavsumni tetik bo‘lib boshlayman. Yoaxim va jamoamizga Yevropa chempionatida muxlislik qilaman”.
Roys 2012-yilgi Yevropa chempionatida bronza medalini qo‘lga kiritgan bo‘lsa, 2016-yilda jarohati tufayli Fransiyadagi musobaqani o‘tkazib yuborgandi.
Serxio Ramos – Ispaniya terma jamoasi himoyachisi
Luis Enrike Yevro—2020 uchun e’lon qilgan tarkibiga tarixda birinchi marta “Real”ning bironta ham futbolchisini kiritmadi. Hatto terma jamoada o‘tkazilgan o‘yinlar soni (180) bo‘yicha rekordchi Serxio Ramos ham ro‘yxatdan chetda qoldi. Enrike bu qarorini himoyachining jarohatdan to‘liq forig‘ bo‘lmagani bilan izohladi.
“Ramosning Yevro–2020 da o‘ynashini juda istardim. U musobaqadan oldin jarohatini to‘liq davolay olish ehtimoli ham bor edi, ammo so‘nggi pallaga kelib, deyarli hech qanday imkoniyat yo‘qligini tushundim. Ayniqsa, so‘nggi oylarda u juda ko‘p o‘yinlarni o‘tkazib yubordi”.
Ramosning o‘zi ham ushbu qarorga ortiqcha e’tiroz bildirmadi va musobaqa oldidan Ispaniyaga omad tiladi.
“Vatanimga yordam bera olmasligim menga azob beradi, lekin samimiy bo‘lish kerak: bu holatda dam olish, tiklanish va keyingi mavsumga tayyorlanish yaxshi bo‘lardi. Men barcha jamoadoshlarimga omad tilayman va ularni uydan turib qo‘llab-quvvatlayman”, – deydi Serxio Ramos.
Yevropa chempionati 2021-yilning 11-iyunidan 11-iyuligacha bo‘lgan muddatda bo‘lib o‘tadi. Unda 24 ta jamoa 6 ta guruhga bo‘lingan holda bir-biri bilan bahs olib boradi.
Izoh (0)