Qaysi jamoada o‘ynashni maqsad qilgani, faoliyatidagi muvaffaqiyat va omadsizliklar haqida Eldor Shomurodov bilan intervyu

Italiyaning “Jenoa” klubi hujumchisi Eldor Shomurodov “MFaktor” kanaliga intervyu berdi. Unda o‘zbekistonlik o‘yinchining futbolga kirib kelishi, Italiyadagi faoliyati va oldiga qo‘ygan maqsadlari haqida so‘z bordi. “Daryo” ushbu intervyu matnini taqdim etadi.

Tug‘ilib o‘sgan joyi haqida

Surxondaryo viloyatining Jarqo‘rg‘on tumanida tug‘ilganman, yoshlik davrim o‘sha yerlarda o‘tgan. U yerda hamma qatori yoshlikdan futbolga qiziqib, mahalladagi bolalar bilan ko‘chada futbol o‘ynab o‘sganman. Har doim futbolga qiziqish katta bo‘lib, shu muhitda katta bo‘lganman deb bemalol ayta olaman. Albatta, o‘ziga yarasha qiyinchiliklar ham bo‘lgan. Lekin hech narsadan kam bo‘lmay, yaxshi sharoitda o‘sganman. Uyimdagilar hamma sharoitlarni qilib berishgan.

Eldor Shomurodovning muvaffaqiyat formulasi bormi?

Muvaffaqiyatning formulasi — birinchi navbatda oddiylik, mehnat va sabr. Shu uchalasi bir-biriga juda qattiq bog‘langan. Mana shu xislatlarga ega bo‘lgan inson hayotda nimagadir erisha oladi deb o‘ylayman.

Eng katta muvaffaqiyat va muvaffaqiyatsizliklar haqida

Hozirgacha eng katta erishgan yutug‘im — farzandli bo‘lganim. Chunki birinchi marta o‘zingizni mas’uliyatli bo‘lganingizni, katta hayotga qadam qo‘yganingizni his qilasiz. Hayotingizdagi ko‘p narsalar o‘zgaradi va bunga qo‘shimcha qilib, futbolda erishayotgan yutuqlarimni ham aytishim mumkin.

Yoshligimda bir voqea bo‘lgan. Buni eng katta muvaffaqiyatsizligim ham deb ayta olmayman. “Mash’al” akademiyasida o‘qib yurgan kezlarimda, dam olish uchun uyga javob berishgan. Keyin esa ularning qaysi kun yig‘ilishini bilmasdan bir kun kech borganman. O‘shanda akademiyadan haydalishimga oz qolgan. Agar o‘shanda haydalib ketganimda, hozirgi yutuqlarim bo‘lmasdi. Chunki “Mash’al” akademiyasida ko‘p narsalarni o‘rganganman. Futbol sirlarini shu akademiya menga o‘rgatgan.

O‘ziga bo‘lgan ishonchning so‘nib ketishi borasida

Bu hol menda juda ko‘p uchraydi. Shunday vaqtlar bo‘ladiki, inson hech narsa qilgisi kelmaydi, hech narsani xohlamay qoladi. Futbol sabab ota-onamdan, oilamdan uzoqda bo‘lganman. O‘sha paytlarda futbolni tashlab ketish fikri xayolga kelardi. Barchasini yig‘ishtirib, ota-onamning yoniga qaytib, ular bilan birga yashashni istardim. Lekin bir narsani his qilardim — ota-onam har doim mening futbolchi bo‘lishimni istashi, doimo qo‘llab-quvvatlab turishi kuch-quvvat bergan. Shuning uchun ham bunday vaziyatlardan chiqib ketishda yaqinlarim, ota-onamning qo‘llab turishi evaziga o‘zimda kuch topa olganman.

Covid-19 tufayli qo‘yilgan taqiqlar sabab Italiyaga bir o‘zim borishimga to‘g‘ri kelgan. 20 kun davomida agentim u yerga joylashib olishimga yordam berib turgan. U ketganidan so‘ng esa, bir o‘zim qolganman. Hech kim yo‘q, begona til, begona muhit. Faqatgina telefon bor. Shu orqali uydagilar bilan gaplashib turardim. Keyinchalik esa telefonga ham qaragim kelmay qolgandi. Til o‘rganishga harakat qilardim, ammo til o‘rganish qiyin, so‘zlar darhol yodda qolmasdi. Shu tomonlama qiyinchiliklar bo‘lgan. Keyin terma jamoa yig‘ini uchun uyga qaytib keldim. Oilamni ham vizasi tayyor bo‘ldi. Ularni o‘zim bilan olib ketdim, shundan so‘ng sal yengilroq bo‘ldi. Endi uyda kutib oladigan inson bor, farzandim ham 3 oylik bo‘lib qolgandi.

Shomurodovdan yoshlarga tavsiya

Inson o‘sishga erishishi uchun, o‘zidan ko‘p narsa biladigan ustozlar bilan suhbatda kerakli narsalarni ola bilishi zarur. Hamma narsani birdagina o‘zlashtirib bo‘lmaydi, har kuni hech bo‘lmasa bitta o‘zingizdan tajribaliroq inson bilan suhbat qurasiz. Undan bitta narsani o‘zlashtirsangiz ham, bu sizning foydangiz. Bu narsa hayot uchun juda kerak bo‘ladi. Keyin esa oldinga maqsad qo‘yib, o‘sha maqsad sari harakat qilish kerak. Inson o‘sha maqsadga erishishiga ishonishi lozim. Shu narsalar juda ham muhim.

Qaysi oilada tug‘ilish, kim bo‘lishni belgilab beradimi?

Albatta, o‘zbek xalqida bir ibora bor: qush uyasida ko‘rganini qiladi. Esimni taniganimdan buyon dadam o‘ynagan o‘yinlarni ko‘rish uchun stadionga borardim. Amakim ham futbolchi bo‘lgan. Uning ham o‘yinlarini ko‘rishga borardim. O‘ylashimcha, mana shu narsalar kasb tanlashimda juda katta rol o‘ynagan. 6 yoshimda mashg‘ulotlar uchun stadionga bormoqchi bo‘lganman. Ammo yoshim kichikligi uchun qabul qilishmagan. O‘sha vaqtlarda yoshingiz yetmasa o‘qishga qabul qilishmasdi, hozir esa istalgan yoshda qabul qilishyapti. 7 yoshimda maktabga chiqqanimdan so‘ng, mashg‘ulotlarga ham borishni boshlaganman. Ungacha esa amakivachchalarim bilan futbol o‘ynardim. Shu tariqa futbolni o‘rganganman. Sportchi bo‘lishimda oilamda futbolchilarning ko‘pligi juda katta rol o‘ynagan deb bemalol ayta olaman.

Qancha pul topishi va qaysi jamoaga o‘tish istagida ekani haqida

Yoshligimda “Chelsi”ga muxlislik qilardim. Oilamdagilar “katta bo‘lsang, shu jamoada o‘ynash nasib qiladi”, deb ko‘p bora ta’kidlashardi. Xohishimga kelsak, Chempionlar Ligasida qatnashadigan jamoada o‘ynashni xohlayman. Ko‘proq o‘sishga erishib, kuchliroq jamoada o‘ynash istagidaman. Shuning uchun qaysi jamoada to‘p surishim mumkinligini aniq ayta olmayman. O‘sha darajaga chiqishga harakat qilyapman.

Yoshligimdan birinchi o‘ringa pulni emas futbolni qo‘y deb o‘rgatishgan. Oilamda futbolni tushunadiganlar ko‘p va ular menga kerakli maslahatlarni bergan. Shuning uchun faqat o‘sishga harakat qilganman, pul esa shuning ortidan kelaveradi.

Eldor Shomurodov, “Jenoa” futbolchisi