Кўхна қитъанинг энг нуфузли мусобақаси Европа чемпионати бошланишига ҳам тобора кам вақт қолмоқда. Унда иштирок этадиган аксарият терма жамоалар мусобақа учун қайдномалар ва кенгайтирилган таркибларни эълон қилиб улгурди. Бу хабарлардан сўнг кўплаб юлдузларнинг Еврода иштирок эта олмаслиги ойдинлашди. Уларнинг аксариятига футболчиларнинг азалий душмани – жароҳатлар тўсқинлик қилмоқда. Демак, қуйида жароҳат сабаб Евро–2020 ни ўтказиб юборадиган машҳур футболчилар ҳақида фикр юритилади.
Марк-Андре тер Штеген – Германия терма жамоаси дарвозабони
Тер Штеген яқинлашиб келаётган Европа чемпионатини ўтказиб юбориши ҳақида ўзи маълумот берди. Дарвозабон Instagram саҳифасида шундай ёзади: «Клуб тиббиёт ходимлари билан биргаликда қўшимча операция ўтказишга қарор қилдик. Евро—2020 ни ўтказиб юборишимдан афсусдаман. Кўп йиллар давомида биринчи марта ўз уйимдан туриб, ватаним жамоасини қўллаб-қувватлайман. Мусобақада ғалаба қозонамиз деган умиддаман».
Тер Штеген 20 май куни операция столига ётди ва тиззасидан муваффақиятли операция қилинди. Бироқ унинг йўқлиги Германия терма жамоасига ортиқча муаммо туғдирмаса керак, боиси таркибда Мануэль Нойер ва Бернард Лено каби етук посбонлар бор.
Виржил ван Дейк – Нидерландия терма жамоаси ҳимоячиси
«Ливерпуль» ҳимоячиси 2020 йилнинг октябрида АПЛ доирасида ўтказилган «Эвертон»га қарши ўйинда жиддий жароҳат олиб, сафдан чиққанди. Бунгача у атиги бешта ўйин ўтказганди. Ван Дейк ҳамон тикланиш жараёнини давом эттирмоқда ва Евро–2020 да Нидерландия терма жамоасига ёрдам берма олмаслигини айтди.
«Жароҳатдан сўнг мен узоқ йўлни босиб ўтдим. Ҳозирча ҳамма нарса яхши кетмоқда. Яқинда жиддий қарорни қабул қилдим. Еврога бормаслигим ва мавсумлар оралиғида якуний тикланиш босқичини ўтказишим тўғри бўлади деб ўйлайман. Мавсумолди тайёргарлик босқичида сафга қайтишни мақсад қилганман. Албатта, Европа чемпионатида ўйнамаётганимдан қайғудаман, аммо мен ва барча ҳозирги вазиятни қабул қилишимиз керак», – дейди ҳимоячи.
Ансу Фати – Испания терма жамоаси ярим ҳимоячиси
«Барселона» ярим ҳимоячисининг яна бир марта операцияга муҳтожлиги ҳақида узоқ вақт давомида гапирилди. 2020 йилнинг ноябрь ойида «Бетис»га қарши ўйинда Ансу Фати тиззасидан оғир жароҳат олди. Дастлаб унинг тўрт ой муддатга сафдан чиққани айтилди. Бироқ у ҳамон майдонга қайтмади, ярим ҳимоячининг тезроқ тикланиши учун амалга оширилган барча процедуралар беҳуда кетмоқда. Энди Фати тиззасини қайта операция қилдиришга ва Европа чемпионатини ўтказиб юборишга мажбур бўлади.
Златан Ибраҳимович – Швеция терма жамоаси ҳужумчиси
Ортда қолган 2020/21 йилги мавсумда ҳам Ибра яна бир бор рақибларини голлари билан ранжитди, шунингдек, ўзи ҳам жароҳатлар туфайли яхшигина қийналди. Златан турли даражадаги жароҳатлар ва коронавирус туфайли А Сериянинг 17 учрашувини ўтказиб юборди. Шунга қарамай, форвард «Милан»га жуда катта фойда келтирди деб айтиш мумкин – 19 учрашувда 15 гол ва 2 та голли узатма. Ва бу орқали у 2016 йилдан кейин илк марта мамлакат бош жамоасига чақирилди. Мураббийлар ундан Европа чемпионатида фойдаланишни мақсад қилганди.
Аммо мавсумнинг сўнгги қисмида тиззасидан олган жароҳати унга қимматга тушди. Швеция терма жамоаси бош мураббийи Янне Андерссон Златаннинг мусобақада жамоага ёрдам бера олмаслигини маълум қилди.
«Златан жароҳати Еврода қатнашишига йўл қўймаслигини айтди. Албатта, бу Ибраҳимович учун ҳам, биз учун ҳам қайғули янгилик. Умид қиламанки, у тез орада майдонга қайтади», – дейди мураббий.
Ҳозир Ибраҳимович 39 ёшда, бундан кейин у яна терма жамоага чақирилади деб ҳеч ким кафолат бера олмайди.
Марко Ройс – Германия терма жамоаси ярим ҳимоячиси
Ройс ҳам Евро–2020 да қатнашмайди, бу ҳақида унинг ўзи маълум қилди. «Мураккаб, ҳолдан тойдирган ва бахтимизга, омадли ўтган мавсумдан сўнг Йоахим Лёв билан Европа чемпионатига бормасликка қарор қилдик. Бу қарор мен учун жуда қийин бўлди, чунки мен доимо ўз мамлакатим учун ўйнашдан хурсанд бўлиб келганман. Аммо қийин ўтган бир йилдан сўнг танамга тикланиш учун вақт беришга қарор қилдим. Танаффусдан фойдаланиб, янги мавсумни тетик бўлиб бошлайман. Йоахим ва жамоамизга Европа чемпионатида мухлислик қиламан».
Ройс 2012 йилги Европа чемпионатида бронза медалини қўлга киритган бўлса, 2016 йилда жароҳати туфайли Франциядаги мусобақани ўтказиб юборганди.
Серхио Рамос – Испания терма жамоаси ҳимоячиси
Луис Энрике Евро—2020 учун эълон қилган таркибига тарихда биринчи марта «Реал»нинг биронта ҳам футболчисини киритмади. Ҳатто терма жамоада ўтказилган ўйинлар сони (180) бўйича рекордчи Серхио Рамос ҳам рўйхатдан четда қолди. Энрике бу қарорини ҳимоячининг жароҳатдан тўлиқ фориғ бўлмагани билан изоҳлади.
«Рамоснинг Евро–2020 да ўйнашини жуда истардим. У мусобақадан олдин жароҳатини тўлиқ даволай олиш эҳтимоли ҳам бор эди, аммо сўнгги паллага келиб, деярли ҳеч қандай имконият йўқлигини тушундим. Айниқса, сўнгги ойларда у жуда кўп ўйинларни ўтказиб юборди».
Рамоснинг ўзи ҳам ушбу қарорга ортиқча эътироз билдирмади ва мусобақа олдидан Испанияга омад тилади.
«Ватанимга ёрдам бера олмаслигим менга азоб беради, лекин самимий бўлиш керак: бу ҳолатда дам олиш, тикланиш ва кейинги мавсумга тайёрланиш яхши бўларди. Мен барча жамоадошларимга омад тилайман ва уларни уйдан туриб қўллаб-қувватлайман», – дейди Серхио Рамос.
Европа чемпионати 2021 йилнинг 11 июнидан 11 июлигача бўлган муддатда бўлиб ўтади. Унда 24 та жамоа 6 та гуруҳга бўлинган ҳолда бир-бири билан баҳс олиб боради.
Изоҳ (0)