Қайси жамоада ўйнашни мақсад қилгани, фаолиятидаги муваффақият ва омадсизликлар ҳақида Элдор Шомуродов билан интервью

Италиянинг «Женоа» клуби ҳужумчиси Элдор Шомуродов «МФактор» каналига интервью берди. Унда ўзбекистонлик ўйинчининг футболга кириб келиши, Италиядаги фаолияти ва олдига қўйган мақсадлари ҳақида сўз борди. «Дарё» ушбу интервью матнини тақдим этади.

Туғилиб ўсган жойи ҳақида

Сурхондарё вилоятининг Жарқўрғон туманида туғилганман, ёшлик даврим ўша ерларда ўтган. У ерда ҳамма қатори ёшликдан футболга қизиқиб, маҳалладаги болалар билан кўчада футбол ўйнаб ўсганман. Ҳар доим футболга қизиқиш катта бўлиб, шу муҳитда катта бўлганман деб бемалол айта оламан. Албатта, ўзига яраша қийинчиликлар ҳам бўлган. Лекин ҳеч нарсадан кам бўлмай, яхши шароитда ўсганман. Уйимдагилар ҳамма шароитларни қилиб беришган.

Элдор Шомуродовнинг муваффақият формуласи борми?

Муваффақиятнинг формуласи — биринчи навбатда оддийлик, меҳнат ва сабр. Шу учаласи бир-бирига жуда қаттиқ боғланган. Мана шу хислатларга эга бўлган инсон ҳаётда нимагадир эриша олади деб ўйлайман.

Энг катта муваффақият ва муваффақиятсизликлар ҳақида

Ҳозиргача энг катта эришган ютуғим — фарзандли бўлганим. Чунки биринчи марта ўзингизни масъулиятли бўлганингизни, катта ҳаётга қадам қўйганингизни ҳис қиласиз. Ҳаётингиздаги кўп нарсалар ўзгаради ва бунга қўшимча қилиб, футболда эришаётган ютуқларимни ҳам айтишим мумкин.

Ёшлигимда бир воқеа бўлган. Буни энг катта муваффақиятсизлигим ҳам деб айта олмайман. «Машъал» академиясида ўқиб юрган кезларимда, дам олиш учун уйга жавоб беришган. Кейин эса уларнинг қайси кун йиғилишини билмасдан бир кун кеч борганман. Ўшанда академиядан ҳайдалишимга оз қолган. Агар ўшанда ҳайдалиб кетганимда, ҳозирги ютуқларим бўлмасди. Чунки «Машъал» академиясида кўп нарсаларни ўрганганман. Футбол сирларини шу академия менга ўргатган.

Ўзига бўлган ишончнинг сўниб кетиши борасида

Бу ҳол менда жуда кўп учрайди. Шундай вақтлар бўладики, инсон ҳеч нарса қилгиси келмайди, ҳеч нарсани хоҳламай қолади. Футбол сабаб ота-онамдан, оиламдан узоқда бўлганман. Ўша пайтларда футболни ташлаб кетиш фикри хаёлга келарди. Барчасини йиғиштириб, ота-онамнинг ёнига қайтиб, улар билан бирга яшашни истардим. Лекин бир нарсани ҳис қилардим — ота-онам ҳар доим менинг футболчи бўлишимни исташи, доимо қўллаб-қувватлаб туриши куч-қувват берган. Шунинг учун ҳам бундай вазиятлардан чиқиб кетишда яқинларим, ота-онамнинг қўллаб туриши эвазига ўзимда куч топа олганман.

Cовид-19 туфайли қўйилган тақиқлар сабаб Италияга бир ўзим боришимга тўғри келган. 20 кун давомида агентим у ерга жойлашиб олишимга ёрдам бериб турган. У кетганидан сўнг эса, бир ўзим қолганман. Ҳеч ким йўқ, бегона тил, бегона муҳит. Фақатгина телефон бор. Шу орқали уйдагилар билан гаплашиб турардим. Кейинчалик эса телефонга ҳам қарагим келмай қолганди. Тил ўрганишга ҳаракат қилардим, аммо тил ўрганиш қийин, сўзлар дарҳол ёдда қолмасди. Шу томонлама қийинчиликлар бўлган. Кейин терма жамоа йиғини учун уйга қайтиб келдим. Оиламни ҳам визаси тайёр бўлди. Уларни ўзим билан олиб кетдим, шундан сўнг сал енгилроқ бўлди. Энди уйда кутиб оладиган инсон бор, фарзандим ҳам 3 ойлик бўлиб қолганди.

Шомуродовдан ёшларга тавсия

Инсон ўсишга эришиши учун, ўзидан кўп нарса биладиган устозлар билан суҳбатда керакли нарсаларни ола билиши зарур. Ҳамма нарсани бирдагина ўзлаштириб бўлмайди, ҳар куни ҳеч бўлмаса битта ўзингиздан тажрибалироқ инсон билан суҳбат қурасиз. Ундан битта нарсани ўзлаштирсангиз ҳам, бу сизнинг фойдангиз. Бу нарса ҳаёт учун жуда керак бўлади. Кейин эса олдинга мақсад қўйиб, ўша мақсад сари ҳаракат қилиш керак. Инсон ўша мақсадга эришишига ишониши лозим. Шу нарсалар жуда ҳам муҳим.

Қайси оилада туғилиш, ким бўлишни белгилаб берадими?

Албатта, ўзбек халқида бир ибора бор: қуш уясида кўрганини қилади. Эсимни таниганимдан буён дадам ўйнаган ўйинларни кўриш учун стадионга борардим. Амаким ҳам футболчи бўлган. Унинг ҳам ўйинларини кўришга борардим. Ўйлашимча, мана шу нарсалар касб танлашимда жуда катта рол ўйнаган. 6 ёшимда машғулотлар учун стадионга бормоқчи бўлганман. Аммо ёшим кичиклиги учун қабул қилишмаган. Ўша вақтларда ёшингиз етмаса ўқишга қабул қилишмасди, ҳозир эса исталган ёшда қабул қилишяпти. 7 ёшимда мактабга чиққанимдан сўнг, машғулотларга ҳам боришни бошлаганман. Унгача эса амакиваччаларим билан футбол ўйнардим. Шу тариқа футболни ўрганганман. Спортчи бўлишимда оиламда футболчиларнинг кўплиги жуда катта рол ўйнаган деб бемалол айта оламан.

Қанча пул топиши ва қайси жамоага ўтиш истагида экани ҳақида

Ёшлигимда «Челси»га мухлислик қилардим. Оиламдагилар «катта бўлсанг, шу жамоада ўйнаш насиб қилади», деб кўп бора таъкидлашарди. Хоҳишимга келсак, Чемпионлар Лигасида қатнашадиган жамоада ўйнашни хоҳлайман. Кўпроқ ўсишга эришиб, кучлироқ жамоада ўйнаш истагидаман. Шунинг учун қайси жамоада тўп суришим мумкинлигини аниқ айта олмайман. Ўша даражага чиқишга ҳаракат қиляпман.

Ёшлигимдан биринчи ўринга пулни эмас футболни қўй деб ўргатишган. Оиламда футболни тушунадиганлар кўп ва улар менга керакли маслаҳатларни берган. Шунинг учун фақат ўсишга ҳаракат қилганман, пул эса шунинг ортидан келаверади.

Элдор Шомуродов, «Женоа» футболчиси