“Manchester Siti” yarim himoyachisi Kevin de Bryuyne Chempionlar Ligasi finali doirasida “Chelsi”ga qarshi o‘yinda (0:1) olgan jarohati haqida ma’lumot berdi.
“Menga burun suyaklari va chap ko‘z devorchasining sinishi tashxisi qo‘yildi. Hozir o‘zimni yaxshi his qilyapman.
Albatta, kechagi voqeadan hafsalam pir bo‘lgan. Biz qaytamiz”, — deb yozadi belgiyalik futbolchi Twitter sahifasida.
Belgiyalik futbolchi uchrashuvning 56-daqiqasida londonliklar himoyachisi Antonio Ryudiger bilan to‘qnashib ketdi. Shundan so‘ng unga uzoq vaqt davomida tibbiy yordam ko‘rsatilganiga qaramay, yakunda maydonni erta tark etishga majbur bo‘ldi.
ESPN nashri xabariga ko‘ra ko‘z devorchasi suyaklarining o‘z holiga qaytishi uchun kamida uch hafta vaqt ketadi, bu esa futbolchining Yevropa chempionatida qatnashishini so‘roq ostida qoldiradi. Shuningdek, de Bryuynening musobaqada himoya niqobida harakat qilishi mumkinligi ham qo‘shimcha qilingan.
Eslatib o‘tamiz, Yevro—2020 musobaqasi 11-iyundan 11-iyulgacha bo‘lgan muddatda bo‘lib o‘tadi.
Izoh (0)