Dunyoda koronavirus bilan kasallanganlar soni 170 189 835 kishini tashkil qilmoqda. Jons Hopkins universiteti ma’lumotlari shundan darak bermoqda. Virus qurbonlari soni esa 3 538 196 kishiga yetdi. Kasallanish holatlarining ko‘pligi bo‘yicha AQSh (33,2 million), Hindiston (27,8 million), Braziliya (16,5 million), Fransiya (5,7 million) va Turkiya (5,2 million) eng oldinda bormoqda.
Kembrij gersoginyasi Keyt Middlton COVID-19’ga qarshi emlandi
Shahzoda Uilyamning rafiqasi, Kembrij gersoginyasi Keyt koronavirusga qarshi vaksinaning birinchi dozasini oldi.“… Londonning Ilm-fan muzeyida COVID-19’ga qarshi vaksinaning birinchi dozasi bilan emlandim. Vaksinatsiya kampaniyalariga aloqador bo‘lganlarning barchasiga ulkan minnatdorchiligimni bildiraman. Qilayotgan ishlaringiz uchun rahmat”, — deyiladi Kembrij gersogi va gersoginyasining Twitter sahifasida.
Ispaniyada koronavirusni odamning ko‘z tasviri orqali aniqlashni o‘rganishdi
Ispaniyada ko‘zning suratiga qarab, odamning COVID-19’ga chalingan-chalinmaganini aniqlashga qodir bo‘lgan texnologiya taqdim etildi. U Valensiyadagi gastronomik muassasalardan birida xo‘randalarda sinab ko‘rildi.Buning uchun, kirishda odamlarga maxsus ko‘zoynaklar berildi, ular ko‘zlarni suratga tushirdi, sun’iy intellekt esa tasvirni muayyan algoritmlar bo‘yicha tahlil qildi. Natijaga erishish uchun bor-yo‘g‘i 3 soniya vaqt kerak bo‘ladi.
“Bir necha oylar davomida olib borilgan tadqiqotlardan keyin biz COVID-19’ga xos bo‘lgan shamollash belgisi ko‘zlarda aks etishini tushunib yetdik”, — dedi Ispaniya, AQSh va Xitoy jamoalarini birlashtirgan OcuTech loyihasi rahbari Paula Boned.
Uning aytishicha, shifokorlar va muhandislar hamkorlikda yaratgan algoritm ko‘zlardagi boshqa sabablar emas, balki aynan koronavirus oqibatida kelib chiqqan shamollash jarayonlarini aniqlaydi.
Tizim olingan tasvirni tahlil qilib, odamda koronavirus bor-yo‘qligi ehtimolini prognoz qiladi. O‘rganib chiqilgan fotosurat yo‘q qilib yuboriladi, odamga esa shu zahoti COVID-19’ga nisbatan ekspress-test topshirish taklif etiladi.
Ushbu tekshiruv usuli odamlar ommaviy to‘planadigan joylar: aeroportlar, ko‘ngilochar markazlar, mehmonxonalar, restoranlar uchun ayni mos tushishi aytilmoqda.
Olimlar vaksinalarning ayollar va erkaklar uchun samaradorligini taqqosladi
Olimlar taxmin qilishicha, koronavirusga qarshi vaksinaning ta’siri emlanayotgan odamning jinsiga qarab farqlanadi.Ma’lum bo‘lishicha, Pfizer vaksinasining samaradorlik ko‘rsatkichi erkaklarda 96,4 foizga, ayollarda esa 93,7 foizga teng. Ayni vaqtda Moderna vaksinasi erkaklarda 95,4 foiz, ayollarda esa 93,1 foiz samaradorlik ko‘rsatgan. Johnson & Johnson vaksinasining samaradorligi esa erkaklarda 68,8 foiz, ayollarda — 63,4 foizni tashkil qiladi.
Ekspertlar koronavirusga qarshi vaksinatsiyaning o‘ziga xosligini izohlovchi turli taxminlarni aytmoqda. Xususan, ta’kidlanishicha, umuman olganda, ayollar o‘zlarida namoyon bo‘lgan kasallik belgilari haqida xabar berishga va COVID-19’ga nisbatan test topshirishga ko‘proq moyil bo‘ladi.
Bundan tashqari, mutaxassislar qayd etishicha, emlangandan keyin koronavirusga chalinish holatlari asosan 40 yoshdan 74 yoshgacha bo‘lgan odamlar orasida kuzatiladi. Taxminan shu davrda esa ayollarda menopauza kuzatiladi, u infeksiyaga nisbatan ta’sirchanlikka aloqador bo‘lishi mumkin.
“Erkaklar va ayollar o‘rtasidagi biologik farqlar hamda buning ushbu vaksinalarga javoban namoyon bo‘lishi aslida munosib e’tiborni tortmadi”, — dedi Jons Hopkins nomidagi Ayollar salomatligi, jins va gender tadqiqotlar markazi xodimasi Sabra Klayn.
Odatda ayollarda vaksinaga nisbatan immun reaksiyasi erkaklarnikidan kuchliroq bo‘ladi, bu esa himoyaning kuchliroq bo‘lishiga olib keladi. Olimlar fikricha, bunda estrogen miqdorining ko‘proq ekani rol o‘ynaydi, chunki estrogen immun tizimini kuchaytiradi.
Shuningdek,- Ozarbayjon hukumati 31-maydan Boku metropoliteni faoliyatini qayta tikladi, u koronavirus tufayli yarim yildan ortiq vaqtdan buyon yopiq edi: 2020-yil oktabrida karantin choralari kuchaytirilgach, Boku metrosi yo‘lovchilarni qabul qilishni to‘xtatgan edi.
- 31-maydan Chexiyada restoran, bar va kafelar yarim yillik tanaffusdan keyin yana xo‘randalarni qabul qilishni boshlaydi. Ammo odamlar umumiy ovqatlanish joylariga kirish uchun koronavirusga nisbatan manfiy test javobini yoki kasallanib o‘tgani haqidagi ma’lumotnomani ko‘rsatishi kerak.
- Misrda ham kafe, restoran, do‘kon va savdo markazlari faoliyatiga qo‘yilgan cheklovlar olib tashlanadi. 1-iyundan do‘konlar va savdo markazlari 23:00 gacha ishlashi mumkin bo‘ladi, kafe va restoranlar esa 01:00 gacha mijozlarni qabul qiladi. Bungacha ularning ish vaqtlari qisqartirilgan edi.
Izoh (0)