Дунёда коронавирус билан касалланганлар сони 170 189 835 кишини ташкил қилмоқда. Жонс Ҳопкинс университети маълумотлари шундан дарак бермоқда. Вирус қурбонлари сони эса 3 538 196 кишига етди. Касалланиш ҳолатларининг кўплиги бўйича АҚШ (33,2 миллион), Ҳиндистон (27,8 миллион), Бразилия (16,5 миллион), Франция (5,7 миллион) ва Туркия (5,2 миллион) энг олдинда бормоқда.
Кембриж герцогиняси Кейт Миддлтон COVID-19’га қарши эмланди
Шаҳзода Уильямнинг рафиқаси, Кембриж герцогиняси Кейт коронавирусга қарши вакцинанинг биринчи дозасини олди.«… Лондоннинг Илм-фан музейида COVID-19’га қарши вакцинанинг биринчи дозаси билан эмландим. Вакцинация кампанияларига алоқадор бўлганларнинг барчасига улкан миннатдорчилигимни билдираман. Қилаётган ишларингиз учун раҳмат», — дейилади Кембриж герцоги ва герцогинясининг Twitter саҳифасида.
Испанияда коронавирусни одамнинг кўз тасвири орқали аниқлашни ўрганишди
Испанияда кўзнинг суратига қараб, одамнинг COVID-19’га чалинган-чалинмаганини аниқлашга қодир бўлган технология тақдим этилди. У Валенсиядаги гастрономик муассасалардан бирида хўрандаларда синаб кўрилди.Бунинг учун, киришда одамларга махсус кўзойнаклар берилди, улар кўзларни суратга туширди, сунъий интеллект эса тасвирни муайян алгоритмлар бўйича таҳлил қилди. Натижага эришиш учун бор-йўғи 3 сония вақт керак бўлади.
«Бир неча ойлар давомида олиб борилган тадқиқотлардан кейин биз COVID-19’га хос бўлган шамоллаш белгиси кўзларда акс этишини тушуниб етдик», — деди Испания, АҚШ ва Хитой жамоаларини бирлаштирган OcuTech лойиҳаси раҳбари Паула Бонед.
Унинг айтишича, шифокорлар ва муҳандислар ҳамкорликда яратган алгоритм кўзлардаги бошқа сабаблар эмас, балки айнан коронавирус оқибатида келиб чиққан шамоллаш жараёнларини аниқлайди.
Тизим олинган тасвирни таҳлил қилиб, одамда коронавирус бор-йўқлиги эҳтимолини прогноз қилади. Ўрганиб чиқилган фотосурат йўқ қилиб юборилади, одамга эса шу заҳоти COVID-19’га нисбатан экспресс-тест топшириш таклиф этилади.
Ушбу текширув усули одамлар оммавий тўпланадиган жойлар: аэропортлар, кўнгилочар марказлар, меҳмонхоналар, ресторанлар учун айни мос тушиши айтилмоқда.
Олимлар вакциналарнинг аёллар ва эркаклар учун самарадорлигини таққослади
Олимлар тахмин қилишича, коронавирусга қарши вакцинанинг таъсири эмланаётган одамнинг жинсига қараб фарқланади.Маълум бўлишича, Pfizer вакцинасининг самарадорлик кўрсаткичи эркакларда 96,4 фоизга, аёлларда эса 93,7 фоизга тенг. Айни вақтда Moderna вакцинаси эркакларда 95,4 фоиз, аёлларда эса 93,1 фоиз самарадорлик кўрсатган. Johnson & Johnson вакцинасининг самарадорлиги эса эркакларда 68,8 фоиз, аёлларда — 63,4 фоизни ташкил қилади.
Экспертлар коронавирусга қарши вакцинациянинг ўзига хослигини изоҳловчи турли тахминларни айтмоқда. Хусусан, таъкидланишича, умуман олганда, аёллар ўзларида намоён бўлган касаллик белгилари ҳақида хабар беришга ва COVID-19’га нисбатан тест топширишга кўпроқ мойил бўлади.
Бундан ташқари, мутахассислар қайд этишича, эмлангандан кейин коронавирусга чалиниш ҳолатлари асосан 40 ёшдан 74 ёшгача бўлган одамлар орасида кузатилади. Тахминан шу даврда эса аёлларда менопауза кузатилади, у инфекцияга нисбатан таъсирчанликка алоқадор бўлиши мумкин.
«Эркаклар ва аёллар ўртасидаги биологик фарқлар ҳамда бунинг ушбу вакциналарга жавобан намоён бўлиши аслида муносиб эътиборни тортмади», — деди Жонс Ҳопкинс номидаги Аёллар саломатлиги, жинс ва гендер тадқиқотлар маркази ходимаси Сабра Клайн.
Одатда аёлларда вакцинага нисбатан иммун реакцияси эркакларникидан кучлироқ бўлади, бу эса ҳимоянинг кучлироқ бўлишига олиб келади. Олимлар фикрича, бунда эстроген миқдорининг кўпроқ экани рол ўйнайди, чунки эстроген иммун тизимини кучайтиради.
Шунингдек,- Озарбайжон ҳукумати 31 майдан Боку метрополитени фаолиятини қайта тиклади, у коронавирус туфайли ярим йилдан ортиқ вақтдан буён ёпиқ эди: 2020 йил октябрида карантин чоралари кучайтирилгач, Боку метроси йўловчиларни қабул қилишни тўхтатган эди.
- 31 майдан Чехияда ресторан, бар ва кафелар ярим йиллик танаффусдан кейин яна хўрандаларни қабул қилишни бошлайди. Аммо одамлар умумий овқатланиш жойларига кириш учун коронавирусга нисбатан манфий тест жавобини ёки касалланиб ўтгани ҳақидаги маълумотномани кўрсатиши керак.
- Мисрда ҳам кафе, ресторан, дўкон ва савдо марказлари фаолиятига қўйилган чекловлар олиб ташланади. 1 июндан дўконлар ва савдо марказлари 23:00 гача ишлаши мумкин бўлади, кафе ва ресторанлар эса 01:00 гача мижозларни қабул қилади. Бунгача уларнинг иш вақтлари қисқартирилган эди.
Изоҳ (0)