AQShning NASA kosmik agentligi Somon yo‘li galaktik markazining yangi tasvirini e’lon qildi, deb yozadi Meduza. U so‘nggi 20 yil davomida olib borilgan kuzatuvlar chog‘ida olingan 370 ta surat yordamida hosil qilingan.
Ma’lumotlar Janubiy Afrikadagi MeerKAT radioteleskopi va “Chandra” kosmik teleskopi orqali olingan. Ushbu tasvir shu paytgacha e’lon qilinganidan ko‘ra kengroq galaktika yassiligini qamrab oladi.
“Chandra” tomonidan aniqlangan rentgen nurlari to‘q sariq, yashil, ko‘k va siyohrang bilan, MeerKAT orqali olingan ma’lumotlar esa binafsha rang va kulrang bilan ajratilgan.
Massachusets universiteti astronomi Deniyel Van surat ustida so‘nggi bir yil davomida — koronavirus pandemiyasi tufayli karantinda o‘tirib, ish olib borganini aytdi.
“Biz tasvirda ko‘rib turganimiz — galaktikamiz markazidagi agressiv yoki shiddatli ekotizim. U yerda o‘ta yangi yulduzlar, qora tuynuklar va neytron yulduzlar qoldiqlari ko‘p. Har bitta rentgen nuqtasi yoki elementi energiya manbaidan iborat bo‘lib, ularning ko‘pchiligi Somon yo‘li markazida joylashgan”,— dedi astronom.
Somon yo‘lining galaktika markazi Yerdan 26 ming yorug‘lik yili masofasida joylashgan.
Izoh (0)