Shahzoda Uilyam koronavirusga qarshi emlandi, Qozog‘istonda vaksinadan keyin 4 kishi vafot etdi, Misrda karantin uzaytirildi. Koronaxabarlar

20-may holatiga, dunyoda koronavirusni yuqtirib olganlar soni 164 917 999 kishiga yetdi. Kasallanganlar soni bo‘yicha yuqori beshlikdan, doimgidek, AQSh (33 million kishi), Hindiston (25,7 million), Braziliya (15,8 million), Fransiya (5,9 million) va Turkiya (5,1 million) o‘rin olib turibdi. COVID-19 oqibatidagi o‘limlar soni esa butun dunyoda 3 418 023 tani tashkil qilmoqda.

Kembrij gersogi, shahzoda Uilyam koronavirusga qarshi vaksinaning birinchi dozasi bilan emlandi. Bu haqda u o‘zining Twitter sahifasida ma’lum qildi.

U aynan qaysi kompaniya dorisi bilan emlanganiga aniqlik kiritmadi. Britaniyada 2020-yil 8-dekabrdan Pfizer/BioNTech vaksinasi yordamida ommaviy emlash boshlangandi, 2021-yil 4-yanvarda esa AstraZeneca vaksinasi ham muomalaga kiritilgandi.

Shahzoda Uilyam 2020-yil aprelidayoq koronavirus bilan kasallanib o‘tgan, o‘sha vaqtda unda nafas olish bilan bog‘liq muammolar yuzaga kelgan edi. Shundan keyin ko‘p o‘tmay, uning otasi, shahzoda Charlzda ham virus aniqlangan.

Buyuk Britaniya qirolichasi Yelizaveta II yanvar boshida vaksina olgan edi.

Qozog‘istonda COVID-19’ga qarshi emlangandan keyin ko‘p o‘tmay o‘lim yuz berishi bilan bog‘liq to‘rtta holat qayd etilgan. Bu haqda mamlakat sog‘liqni saqlash vaziri o‘rinbosari ma’lum qildi.

Shuningdek, koronavirusga qarshi vaksinaning ikkinchi dozasini olganlar orasida koronavirusni yuqtirib olish bilan bog‘liq 104 ta holat aniqlangan. Ta’kidlanishicha, bemorlarning barchasi vaksinatsiya paytida allaqachon virusni yuqtirib olgan holatda bo‘lgan.

Umuman olganda Qozog‘istonda birinchi dozadan keyin 541 kishi COVID-19 bilan kasallangan, ikkinchi dozadan keyin esa 104 ta holat qayd etilgan.

Bu odamlarning barchasi inkubatsiya davrida — 14 kun ichida kasallangani aytilmoqda. “Ya’ni ular virusni allaqachon yuqtirib olganidan keyin emlangan”, — deyiladi xabarda.

Misr hukumati 19-may kuni bo‘lib o‘tgan majlisda koronavirus pandemiyasi tufayli kiritilgan cheklov choralarini may oxirigacha uzaytirdi.

Iyungacha odamlarning katta guruh bo‘lib to‘planishi, masalan, uchrashuvlar, konferensiyalar, tantanalar, madaniy tadbirlar o‘tkazish taqiqlanadi. To‘y va tug‘ilgan kunlarni faqat ochiq maydonlarda nishonlash mumkin.

Do‘konlar, kafe, restoranlar, teatr va boshqa madaniy-ko‘ngilochar muassasalar 21:00 gacha ishlashi mumkin.

Pandemiya boshidan buyon Misrda qariyb 250 ming kishi virusga chalingan, shularning 14 441 nafari vafot etgan.

Shuningdek:

• Buyuk Britaniyada dunyoda birinchi bo‘lib koronavirusga qarshi vaksinaning uchinchi dozasi samaradorligini tadqiq qilish boshlandi. Sinovlarda 2,8 ming nafar 30 yoshdan oshgan shaxslar ishtirok etadi. Tadqiqotlar butun mamlakat bo‘ylab 16 ta shahardagi 18 ta klinikada o‘tkaziladi.
• Filippin hukumati vaksinatsiya markazlarida taklif etiladigan koronavirusga qarshi vaksinalar nomlarini odamlarga oldindan aytmaslikka qaror qildi. Ammo odamlar o‘zlari emlanadigan vaksina haqidagi ma’lumotdan mahrum qilinmaydi — dori va uning ikkilamchi ta’sirlari haqida ularga vaksinatsiya punktida ma’lumot beriladi.
• AQSh Pfizer kompaniyasining koronavirusga qarshi vaksinasini eritilganidan keyin va inyeksiya oldidan suyultirishdan avval bir oygacha muddatda oddiy sovitkichda saqlashga ruxsat berdi. Shu paytgacha ushbu muddat besh kunga teng edi. Vaksinani uzoq vaqt saqlash uchun esa -70 °C sharoit talab qilinadi.