1 milliondan ortiq mehmon, o‘zbek estradasi yulduzlari va bayramona mushakbozlik: Namanganda Xalqaro gullar festivali yakuniga yetdi (foto va video)

Namangandagi “Afsonalar vodiysi” bog‘ida Xalqaro gullar festivalining yopilish marosimi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.

Marosimda so‘z olgan viloyat hokimi Shavkat Abdurazzoqov festivalga 500 ming atrofida mehmon tashrif buyurishi kutilganini ma’lum qildi.

Sarhisobda ularning soni ikki baravar ko‘p bo‘ldi. Aniqrog‘i, 1,1 million kishidan oshdi.

Bayram bo‘lib o‘tgan Bobur bog‘iga kuniga o‘rtacha 150 ming kishi kelgani aytilmoqda.

Festivalga xorijliklarning ham qiziqishi katta bo‘ldi. Bayram kunlari Namangan 23 davlat, jumladan, Buyuk Britaniya, Fransiya, Germaniya, Yaponiya, Janubiy Koreya, Hindiston, Turkiya, BAA, Eron, Afg‘oniston, Indoneziya va Isroildan 13 mingdan ortiq mehmonni qabul qildi.

Eng ko‘p sayyohlar MDH davlatlari hissasiga to‘g‘ri keldi. Xususan, Qirg‘izistondan 8203, Rossiyadan 913, Qozog‘istondan 799 va Tojikistondan 701 nafar mehmon gullar bayramini ko‘rgani keldi.

Marosimda festivalning turli nominatsiyalar bo‘yicha g‘oliblari e’lon qilindi. Ular orasida gulchilar, shahar-tuman hokimliklari, korxona va tashkilotlar, jurnalist va blogerlar ham bor.

“Gulchilar sulolasi”, “Eng yaxshi yosh gulchi”, “Eng yaxshi gul kompozitsiyasi”, “Eng yaxshi gulchilik maktabi”, “Eng ko‘p gul yetishtirgan gulchi” kabi nominatsiyalar g‘oliblariga 15 milliondan 20 million so‘mgacha bo‘lgan pul mukofoti sertifikatlari topshirildi.

Festivalning mutlaq g‘oliblariga esa Nexia-3 avtomobillari kaliti topshirildi. Bunga Pop tumani hokimligi, viloyat Qurilish bosh boshqarmasi, Milliy gvardiya viloyat boshqarmasi va gulchi-dizayner Obidxon Qodirov sazovor bo‘ldi.

Nominatsiyalar g‘oliblarini O‘zbekiston xalq artistlari Yulduz Usmonova, Ozodbek Nazarbekov, Zulayho Boyxonova va “Bojalar” guruhi solisti Jahongir Poziljonov qutladi.

Yakunda esa “Afsonalar vodiysi” bog‘i osmonini 5 daqiqa atrofida davom etgan bayramona mushakbozlik bezadi.