1 миллиондан ортиқ меҳмон, ўзбек эстрадаси юлдузлари ва байрамона мушакбозлик: Наманганда Халқаро гуллар фестивали якунига етди (фото ва видео)

Намангандаги «Афсоналар водийси» боғида Халқаро гуллар фестивалининг ёпилиш маросими бўлиб ўтди. Бу ҳақда «Дарё» мухбири Азизбек Абдувалиев хабар бермоқда.

Маросимда сўз олган вилоят ҳокими Шавкат Абдураззоқов фестивалга 500 минг атрофида меҳмон ташриф буюриши кутилганини маълум қилди.

Сарҳисобда уларнинг сони икки баравар кўп бўлди. Аниқроғи, 1,1 миллион кишидан ошди.

Байрам бўлиб ўтган Бобур боғига кунига ўртача 150 минг киши келгани айтилмоқда.

Фестивальга хорижликларнинг ҳам қизиқиши катта бўлди. Байрам кунлари Наманган 23 давлат, жумладан, Буюк Британия, Франция, Германия, Япония, Жанубий Корея, Ҳиндистон, Туркия, БАА, Эрон, Афғонистон, Индонезия ва Исроилдан 13 мингдан ортиқ меҳмонни қабул қилди.

Энг кўп сайёҳлар МДҲ давлатлари ҳиссасига тўғри келди. Хусусан, Қирғизистондан 8203, Россиядан 913, Қозоғистондан 799 ва Тожикистондан 701 нафар меҳмон гуллар байрамини кўргани келди.

Маросимда фестивалнинг турли номинациялар бўйича ғолиблари эълон қилинди. Улар орасида гулчилар, шаҳар-туман ҳокимликлари, корхона ва ташкилотлар, журналист ва блогерлар ҳам бор.

«Гулчилар сулоласи», «Энг яхши ёш гулчи», «Энг яхши гул композицияси», «Энг яхши гулчилик мактаби», «Энг кўп гул етиштирган гулчи» каби номинациялар ғолибларига 15 миллиондан 20 миллион сўмгача бўлган пул мукофоти сертификатлари топширилди.

Фестивальнинг мутлақ ғолибларига эса Nexia-3 автомобиллари калити топширилди. Бунга Поп тумани ҳокимлиги, вилоят Қурилиш бош бошқармаси, Миллий гвардия вилоят бошқармаси ва гулчи-дизайнер Обидхон Қодиров сазовор бўлди.

Номинациялар ғолибларини Ўзбекистон халқ артистлари Юлдуз Усмонова, Озодбек Назарбеков, Зулайҳо Бойхонова ва «Божалар» гуруҳи солисти Жаҳонгир Позилжонов қутлади.

Якунда эса «Афсоналар водийси» боғи осмонини 5 дақиқа атрофида давом этган байрамона мушакбозлик безади.