Farg‘ona viloyatida maktab bitiruvchilarini Koreya xalqaro universitetiga o‘qishga kiritib qo‘yishni va’da qilgan firibgarlarga nisbatan jinoyat ishi qo‘zg‘atildi, deya xabar bermoqda Bosh prokuratura huzuridagi departament matbuot xizmati.
Qayd etilishicha, departament hamda DXXning Farg‘ona viloyati boshqarmalari tomonidan o‘tkazilgan tergovga qadar tekshiruvda, “I.K.”, “A.C.” va “R.S.” MChJ rahbarlari va boshqalar oldindan til biriktirib, “H.I.” MChJ (til markazi) va Koreya xalqaro universiteti o‘rtasida tuzilgan memorandum bekor qilingan bo‘lsa-da, “H.I.” MChJ bilan soxta shartnoma tuzib, maktab bitiruvchilari o‘rtasida targ‘ibot ishlarini o‘tkazgan.
Shu orqali ular to‘lov amalga oshirgan maktab bitiruvchilarini go‘yoki Koreya xalqaro universitetiga imtihonsiz o‘qishga kiritib qo‘yish va boshqa va’dalarni berib, 7 nafar fuqaroning 20,5 million so‘mini firibgarlik yo‘li bilan qo‘lga kiritgani aniqlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval TATUning Samarqand filiali bo‘limi boshlig‘i 3 ming dollar pora bilan qo‘lga tushgani, Toshkent irrigatsiya institutiga o‘qishga kiritish uchun 5 ming dollar so‘ragan shaxs ushlangani hamda Buxorolik folbin ayol aldov yo‘li bilan fuqarodan 1300 dollar pul va moddiy boylik undirgani ma’lum bo‘lgani haqida xabar berilgandi.
Izoh (0)