Namangandagi Xalqaro gullar festivalida kelin-kuyovning nikohi qayd etildi. Ularni xorijdan kelgan mehmonlar ham qutladi
Namanganda o‘tkazilayotgan Xalqaro gullar festivalida Davlat xizmatlari agentligi viloyat boshqarmasi ham alohida pavilyon bilan ishtirok etmoqda. Bu haqda “Daryo” muxbiri Azizbek Abduvaliyev xabar berdi.
Pavilyonda davlat xizmatlari agentligi ramzi tushirilgan gul kompozitsiyasi yaratilib, shu yerning o‘zida aholiga xizmat ko‘rsatilmoqda. Kadastr pasportini tayyorlash, pensiya olish va fuqarolarni qiziqtirgan boshqa ko‘plab yo‘nalishlar yuzasidan maslahat va amaliy yordam berilmoqda.
Xususan, DXA viloyat boshqarmasi tomonidan tug‘ilganlik guvohnomasini o‘z vaqtida olmagan 21 nafar fuqaroga bu haqdagi hujjat va esdalik sovg‘alari topshirildi. Ular orasida qariyb 14 yildan buyon tug‘ilganligi qayd etilmagan Oydina Abdullajonova ham bor.
Gullar festivali doirasida Namangan shahrining Davlatobod tumanida istiqomat qiluvchi Aleksandr Yo‘ldoshev va Muslimaxon Isaboyevaning nikoh guvohnomalari ham tantanali tarzda topshirildi.
Ularni nafaqat yaqinlari, balki bayramga kelgan xorijlik mehmonlar ham qutladi.
“Turmush o‘rtog‘im bilan to‘yimiz bo‘lishidan avval biz ham barcha yoshlar qatori chiroyli orzu-niyatlar qilgan edik. Lekin bu darajada esda qolarli bo‘ladi, gullar festivalida, ko‘plab mehmonlar ishtirokida nikohimiz qayd etiladi deb o‘ylamagandik. Men va ayolimning quvonchining cheki yo‘q, o‘zimizni eng baxtli kelin-kuyovlardan sanayapmiz”, — deydi Aleksandr Yo‘ldoshev.
