Foto: Xalqaro festival arafasida gullarga burkangan Namangan

Namanganda gullar festivaliga qizg‘in hozirlik ko‘rilmoqda. Bu haqda “Daryo” muxbiri Azizbek Abduvaliyev xabar bermoqda.

Festival oltmishinchi bor o‘tkazilmoqda va xalqaro maqomga ega.

Bayramga O‘zbekistonda faoliyat olib borayotgan diplomatik korpus vakillari va Namangan bilan birodarlashgan hududlar delegatsiyalari ham taklif etilgan.

Ular qatorida Pokistonning Panjob, Rossiyaning Chelyabinsk va Sverdlovsk, Qirg‘izistonning Jalolobod viloyatlari, Turkiyaning Isparta va Usmong‘ozi, Xitoyning Sindao, Janubiy Koreyaning Inchxon, Belarusning Mogilyov shaharlari bor.

Festivalning asosiy tadbirlari ertaga, 23-may kuni soat 10:00 da bayramona bezatilgan avtoparad bilan boshlanadi.

Bobur nomli madaniyat va istirohat bog‘iga kelgan mehmonlar Namanganning boy tarixi, hududlari, yetakchi korxona va tashkilotlari haqida yaqqol tasavvurga ega bo‘ladi.

Bog‘ tashqarisida tashkil etiladigan yarmarkada esa turfa gul va ko‘chatlar bilan tanishish hamda xarid qilish mumkin.

Ochilish va yopilish marosimlari, shuningdek, bayram kunlari Namangan sahnalarida taniqli aktyorlar va o‘zbek estradasi yulduzlarining chiqishlari tashkil etiladi.

Festival yakunida bayramda faol ishtirok etgan va hakamlar hay’atining eng ko‘p ovozlarini to‘plagan gulchilar hamda tashkilotlar Nexia 3 avtomobillari bilan taqdirlanadi.