Shavkat Mirziyoyev “Shaffof qurilish” tizimi orqali bir oyda qancha mablag‘ iqtisod qilinganini aytdi

2021-yilda ishga tushirilgan “Shaffof qurilish” tizimi orqali pudratchilarni ochiq-oshkora tanlab olish natijasida bir oyning o‘zida investitsiya dasturlari doirasida 400 milliard so‘mdan ziyod mablag‘ iqtisod qilingan. Bu haqda Prezident Shavkat Mirziyoyev raisligida o‘tkazilayotgan videoselektor yig‘ilishida so‘z yuritildi, deya xabar bermoqda “Daryo” muxbiri.

“Ramatov, Qo‘chqorov, Musayev viloyat, tuman va shahar hokimlari bilan birga ikki hafta muddatda tenderlardan iqtisod qilingan mablag‘larni tegishli hududdagi infratuzilmaviy va ijtimoiy masalalar bilan bog‘liq muammolarni hal qilishga yo‘naltirish bo‘yicha obyektlar kesimida chora-tadbirlar ishlab chiqsin”, — dedi Shavkat Mirziyoyev.

Avvalroq Prezident 26-aprel kuni ko‘p kvartirali uylarni boshqarish tizimini takomillashtirishga oid taqdimot bilan tanishgani, unda sohani tubdan takomillashtirib, xizmat ko‘rsatish bo‘yicha zamonaviy tizim yaratish yuzasidan topshiriqlar bergani, ko‘p qavatli uylarni qurishdan oldin xizmat ko‘rsatishni o‘ylash, turar joylar fondi va hududini oqilona saqlash kerakligini ta’kidlagani haqida xabar berilgan edi.

Eslatib o‘tamiz, O‘zbekiston Prezidentining 2019-yil sentabrdagi qaroriga muvofiq, Qurilish vazirligi faoliyatiga “Shaffof qurilish” milliy axborot tizimi joriy etilishi belgilangan edi. Qurilish vazirligi mutaxassislari tomonidan 2020-yil 1-avgustdan boshlab ushbu tizim Toshkent shahri va Toshkent viloyatida to‘liq ishga tushirilgan, 2021-yil boshidan mamlakatning boshqa hududlarini ham ushbu tizim bilan qamrab olish ko‘zda tutilgani aytilgan. 2020-yilning iyunida qurilish vazirligining yangi loyihalarga bag‘ishlangan tadbirida “Shaffof qurilish” milliy axborot tizimidagi quyi axborot tizimlari haqida ilk marta to‘liq ma’lumot berilgan.