Шавкат Мирзиёев Ўзбекистоннинг 14 та шаҳридаги минглаб кўп қаватли уй-жойларга хизмат кўрсатиш бошқарув-сервис компанияларига берилишини айтди

Президент Шавкат Мирзиёев раислигида ўтказилган йиғилишда давлат раҳбари уй–жой коммунал хўжалик вазири Шерзод Ҳидоятов вилоят, туман ва шаҳар ҳокимлари билан бирга кўп квартирали уйларга хизмат кўрсатиш сифатини ошириш учун уларга бошқарув-сервис компанияларни жалб этиши лозимлигини таъкидлади. Бу ҳақда «Дарё» мухбири хабар бермоқда.

«Масалан, Юнусободда 269 та ширкатни (1 мингта кўп қаватли уй) 12 та бошқарув-сервис компанияларига бириктириш ҳисобига авария ҳолатлари 60 фоизга, муддати ўтган қарздорлик 25 фоизга қисқарган, 1,4 миллиард сўм банк кредити қайтарилган.

Ушбу туманда 110 та кўп қаватли уй–жойга 25 та ширкат (194 та ишчи) қилган ишларни, бугунги кунда 54 та ишчиси бўлган 1 та бошқарув компанияси амалга оширмоқда. Шу билан бирга, бошқарув компанияси қўшимча 9 та мактаб ва боғча ҳамда 50 та тадбиркорлик субъектларини қамраб олган.

Ширкатларда уй-жойларни сақлаш тарифининг 35 фоизи иш ҳақига кетган бўлса, бошқарув компанияси ишчиларига ойликни 2 бараварга оширганда ҳам, бу кўрсаткич 7–8 фоизни ташкил қилмоқда. 2020 йилда иш ҳақидан 324 миллион сўм иқтисод қилган.

Шу боис Ш.Ҳидоятов вилоят ҳокимлари билан бирга икки ой муддатда тажриба тариқасида Нукус (56 та уй), Андижон (134 та), Бухоро (45 та), Жиззах (54 та), Қарши (54 та), Навоий (101 та), Наманган (103 та), Самарқанд (47 та), Термиз (109 та), Гулистон (85 та), Урганч (60 та) Фарғона (90 та), Чирчиқ (74 та) ва Ангрен (92 та) шаҳарларида бошқарув-сервис компаниясини аниқлаб, кўп қаватли уй-жойларга хизмат кўрсатишни уларга берсин. Ушбу ҳудудларда 1,2 мингта кўп қаватли уй-жойда 50 мингта хонадон мавжуд.

Шерзод Ҳидоятов, Жаҳонгир Ортиқхўжаев, Даврон Ҳидоятов 1 августга қадар бошқарув-сервис компаниялари билан ишлаш бўйича Юнусобод тумани ва Чирчиқ шаҳрида намунавий тажриба яратиб, танлаб олинган шаҳар ва туман ҳокимларининг қурилиш ва коммунал хизмат бўйича ўринбосарларини янги тизимда ишлашга ўқицин», – деди Шавкат Мирзиёев.

Бундан аввал Шавкат Мирзиёев «Обод қишлоқ» ва «Обод маҳалла» дастурлари ижросини танқид қилгани, Шавкат Мирзиёев «Шаффоф қурилиш» тизими орқали бир ойда қанча маблағ иқтисод қилинганини айтгани ҳамда Шавкат Мирзиёев кўп квартирали уйларни бошқариш тизимини такомиллаштиришга оид тақдимот билан танишгани ҳақида хабар берилганди.