Andijon viloyati Xalq deputatlari kengashlarining bir guruh deputatlari daxlsizlik huquqidan mahrum qilingan hamkasblari ishi yuzasidan O‘zbekiston Prezidenti Shavkat Mirziyoyevga murojaat qildi.
Murojaatda dastlab so‘zga chiqqan Andijon shahar kengashi deputati Jahongir Jiyanov mamlakatning ijtimoiy-iqtisodiy va siyosiy hayotida islohotlarni amalga oshirishda Prezident bilan yelkama-yelka turib ishlayotganidan xursandligini aytdi. Shu bilan birga, u mansabdor shaxslar tomonidan deputatlarga bosim o‘tkazilishi to‘g‘risida gapirib, kengashning “qonunlar va qonunosti hujjatlariga zid” qarorlaridan noroziligini bildirdi.
Uning so‘zlariga ko‘ra, deputatlar yaqinda hamkasbi Shuhratbek Karimovni daxlsizlik huquqidan mahrum etish to‘g‘risidagi qaror yuzasidan Andijon shahar kengashining 20-sessiyasida chiqarilgan qaror yuzasidan shikoyat qilgan, biroq bir necha kun o‘tgan bo‘lsa-da, hali ham natija yo‘qligini ma’lum qilgan.
“Biz mahalliy kengash deputatining daxlsizligining qo‘pol ravishda buzilishi e’tiborsiz qolib ketayotganidan e’tirozimizni bildirmoqchimiz”, — dedi va Oliy Majlis Senatini kengash qarorini bekor qilishga chaqirdi.
U Prezidentdan vaziyatni nazoratga olishni va mahalliy kengash deputatlarining daxlsizligini kuchaytirishni so‘radi.
Xo‘jaobod tuman kengashi deputati Elyorbek Abduraimov Andijon shahar kengashi harakatlarini “qonunga zid” deb hisoblaydi. Uning ta’kidlashicha, bu nafaqat Andijondagi, balki butun mamlakatdagi deputatlarga aloqador.
Uning so‘zlariga ko‘ra, “prokuratura qonun ustuvorligini ta’minlash uchun mas’ul organ sifatida shaharda noqonuniy harakatlarni tanqid qilgan deputatning daxlsizligini buzgan”.
“Ko‘rinib turibdiki, qonunlarni himoya qiluvchi organlar butun respublika uchun o‘rnak bo‘lish o‘rniga, Prezident va hukumat qarorlariga qarshi chiqishmoqda. Bu deputatlarga hurmatsizlik, xalqqa hurmatsizlik. Deputatlarni xalq saylagan”, — deydi u.
Deputat amaldorlarning xatti-harakatlari doimiy tanqid qilinishiga qaramay, ularga nisbatan hech qanday choralar ko‘rilmasligini eslatib o‘tdi. Shu bilan birga, “oddiy vatanparvar deputat bitta qilgan e’tirozi uchun daxlsizlik huquqidan mahrum qilindi”, — dedi Elyorbek Abduraimov.
“Senat raisi mahalliy kengashlar ishlamayapti, degan ko‘plab e’tiroz qilmoqda. Agar oqibatlari shunday bo‘lsa, mahalliy kengashning qaysi deputati ishlaydi? O‘n besh kun o‘tdi, ammo Senatning sessiyaga jiddiy munosabatini ko‘rmadik”, — deydi u.
Andijon shahar kengashi deputati Diyorbek Abdusamatovning aytishicha, sessiya kuni kengash rahbariyatiga qonun buzilganligi to‘g‘risida xabar bergan, ammo “biron-bir shaxs qonun buzilishining oldini olish choralarini ko‘rmagan”.
Uning so‘zlariga ko‘ra, bo‘lib o‘tgan sessiyadan so‘ng u Tanzila Norboyevaga murojaat qilgan. Senat raisi esa mas’ul xodimni Andijonga jo‘natgan. Lekin mas’ul xodim Diyorbek Abdusamatov bilan uchrashmagan.
Asaka tumani kengashi deputati Sa’dulla Ergashev ham Andijon shahar kengashi sessiyasining “noqonuniy qarorini” bekor qilishni so‘radi.
Xo‘jaobod tumani kengashi deputati Bahodir Saydaliyevning aytishicha, Andijon viloyatining barcha tuman kengashlari Shuhratbek Karimov deputatlik daxlsizligidan mahrum qilinganidan noroziligini bildirgan. Uning fikricha, sessiya “hokim va Andijon prokurori ssenariysi bo‘yicha” tashkil etilgan.
Shahrixon tumani kengashi deputati Mansur Rahmonov deputatlarning murojaatini nazoratga olishni so‘radi.
Eslatib o‘tamiz, 17-may kuni kengash Andijon prokurorining taklifiga binoan shaharda noqonuniy ravishda yer uchastkalari ajratilishiga va hokim Bahromjon Haydarovning qarorlariga qarshi doimiy ravishda qarshi chiqqan deputat Shuhratbek Karimovning daxlsizligidan mahrum qilgani xabar qilingandi. Xuddi shu sessiyada deputatlar tintuv qilingan va ularning telefonlari olib qo‘yilgan.
Adliya vazirligi deputatni tintuv qilish va uning faoliyatiga to‘siq bo‘lishni noqonuniy deb atadi. Shu bilan birga, Bosh prokuratura Shuhratbek Karimov va uning qurilish kompaniyasiga qarshi qo‘zg‘atilgan jinoyat ishida to‘plangan materiallar uni daxlsizlik huquqidan mahrum qilish uchun yetarli asos bo‘lganligini ta’kidladi.
21-may kuni shahar prokurori Qurbonali Asqarov o‘z arizasiga binoan iste’foga chiqdi. Bosh prokuratura hisobotida ta’kidlanishicha, ishdan bo‘shatish Andijon shahar kengashi sessiyasida bo‘lib o‘tgan voqealar bilan bog‘liq emas.
18-may kuni Senatning mahalliy hokimiyat vakillik organlari faoliyatiga ko‘maklashuvchi komissiyasi ushbu tadbirlarni o‘rganishni boshlaganligini e’lon qildi.
“Gazeta.uz”ning Oliy Majlis yuqori palatasiga tayanib xabar qilishicha, sud-huquqiy masalalar va korrupsiyaga qarshi kurashish qo‘mitasi raisining o‘rinbosari Shuhrat Chulliyev va senator Farhod Bakiyev boshchiligidagi qo‘shimcha ishchi guruh viloyatga jo‘nab ketgan.
Qonunchilik palatasi deputatining fikri
Oliy Majlis Qonunchilik palatasi deputati, O‘zLiDeP fraksiyasi a’zosi Rasul Kusherbayevning fikriga ko‘ra, ushbu murojaatni Andijon deputatlarining mahalliy rahbarlarga, shu jumladan, hokimga nisbatan bildirgan norasmiy ishonchsizlik votumi sifatida qarash mumkin.
“Ushbu holat yana bir bor deputatlarning tuman va shahar hokimlariga nisbatan ishonchizlik votumi bildira olishi nima uchun zarurligini ko‘rsatib turibdi. Demak, buni qonunlarda ham qat’iy mustahkamlab qo‘yish vaqti allaqachon kelgan. Toki hokim haqiqatda kengashga hisobdor bo‘lishi, xalq vakillariga bepisandlik qilmasligi, qonunlarni buzmasligi uchun”, — dedi parlament a’zosi.
Uning fikriga ko‘ra, bu holat “kuchlarning bir bo‘g‘inda haddan tashqari to‘planishi” bilan bog‘liq.
“Oqibat esa bu ayrim hokimlarning qonunsiz harakat qilib, o‘zini ‘mutlaq hukmdor” sifatida tutishigacha olib kelmoqda. Bu yomon. Bir haqiqat ravshanlashib boryapti: deputatlar o‘z ish faoliyatini xalq manfaati yo‘lida olib borishi uchun daxlsizligi va xavfsizligi amalda to‘liq ta’minlanmas ekan, fuqarolik jamiyatini qurish, degan gaplar qog‘ozda qolib ketaveradi”, — dedi Kusherbayev.
Izoh (0)