Андижон вилояти Халқ депутатлари кенгашларининг бир гуруҳ депутатлари дахлсизлик ҳуқуқидан маҳрум қилинган ҳамкасблари иши юзасидан Ўзбекистон Президенти Шавкат Мирзиёевга мурожаат қилди.
Мурожаатда дастлаб сўзга чиққан Андижон шаҳар кенгаши депутати Жаҳонгир Жиянов мамлакатнинг ижтимоий-иқтисодий ва сиёсий ҳаётида ислоҳотларни амалга оширишда Президент билан елкама-елка туриб ишлаётганидан хурсандлигини айтди. Шу билан бирга, у мансабдор шахслар томонидан депутатларга босим ўтказилиши тўғрисида гапириб, кенгашнинг «қонунлар ва қонуности ҳужжатларига зид» қарорларидан норозилигини билдирди.
Унинг сўзларига кўра, депутатлар яқинда ҳамкасби Шуҳратбек Каримовни дахлсизлик ҳуқуқидан маҳрум этиш тўғрисидаги қарор юзасидан Андижон шаҳар кенгашининг 20-сессиясида чиқарилган қарор юзасидан шикоят қилган, бироқ бир неча кун ўтган бўлса-да, ҳали ҳам натижа йўқлигини маълум қилган.
«Биз маҳаллий кенгаш депутатининг дахлсизлигининг қўпол равишда бузилиши эътиборсиз қолиб кетаётганидан эътирозимизни билдирмоқчимиз», — деди ва Олий Мажлис Сенатини кенгаш қарорини бекор қилишга чақирди.
У Президентдан вазиятни назоратга олишни ва маҳаллий кенгаш депутатларининг дахлсизлигини кучайтиришни сўради.
Хўжаобод туман кенгаши депутати Элёрбек Абдураимов Андижон шаҳар кенгаши ҳаракатларини «қонунга зид» деб ҳисоблайди. Унинг таъкидлашича, бу нафақат Андижондаги, балки бутун мамлакатдаги депутатларга алоқадор.
Унинг сўзларига кўра, «прокуратура қонун устуворлигини таъминлаш учун масъул орган сифатида шаҳарда ноқонуний ҳаракатларни танқид қилган депутатнинг дахлсизлигини бузган».
«Кўриниб турибдики, қонунларни ҳимоя қилувчи органлар бутун республика учун ўрнак бўлиш ўрнига, Президент ва ҳукумат қарорларига қарши чиқишмоқда. Бу депутатларга ҳурматсизлик, халққа ҳурматсизлик. Депутатларни халқ сайлаган», — дейди у.
Депутат амалдорларнинг хатти-ҳаракатлари доимий танқид қилинишига қарамай, уларга нисбатан ҳеч қандай чоралар кўрилмаслигини эслатиб ўтди. Шу билан бирга, «оддий ватанпарвар депутат битта қилган эътирози учун дахлсизлик ҳуқуқидан маҳрум қилинди», — деди Элёрбек Абдураимов.
«Сенат раиси маҳаллий кенгашлар ишламаяпти, деган кўплаб эътироз қилмоқда. Агар оқибатлари шундай бўлса, маҳаллий кенгашнинг қайси депутати ишлайди? Ўн беш кун ўтди, аммо Сенатнинг сессияга жиддий муносабатини кўрмадик», — дейди у.
Андижон шаҳар кенгаши депутати Диёрбек Абдусаматовнинг айтишича, сессия куни кенгаш раҳбариятига қонун бузилганлиги тўғрисида хабар берган, аммо «бирон-бир шахс қонун бузилишининг олдини олиш чораларини кўрмаган».
Унинг сўзларига кўра, бўлиб ўтган сессиядан сўнг у Танзила Норбоевага мурожаат қилган. Сенат раиси эса масъул ходимни Андижонга жўнатган. Лекин масъул ходим Диёрбек Абдусаматов билан учрашмаган.
Асака тумани кенгаши депутати Саъдулла Эргашев ҳам Андижон шаҳар кенгаши сессиясининг «ноқонуний қарорини» бекор қилишни сўради.
Хўжаобод тумани кенгаши депутати Баҳодир Сайдалиевнинг айтишича, Андижон вилоятининг барча туман кенгашлари Шуҳратбек Каримов депутатлик дахлсизлигидан маҳрум қилинганидан норозилигини билдирган. Унинг фикрича, сессия «ҳоким ва Андижон прокурори сценарийси бўйича» ташкил этилган.
Шаҳрихон тумани кенгаши депутати Мансур Раҳмонов депутатларнинг мурожаатини назоратга олишни сўради.
Эслатиб ўтамиз, 17 май куни кенгаш Андижон прокурорининг таклифига биноан шаҳарда ноқонуний равишда ер участкалари ажратилишига ва ҳоким Баҳромжон Ҳайдаровнинг қарорларига қарши доимий равишда қарши чиққан депутат Шуҳратбек Каримовнинг дахлсизлигидан маҳрум қилгани хабар қилинганди. Худди шу сессияда депутатлар тинтув қилинган ва уларнинг телефонлари олиб қўйилган.
Адлия вазирлиги депутатни тинтув қилиш ва унинг фаолиятига тўсиқ бўлишни ноқонуний деб атади. Шу билан бирга, Бош прокуратура Шуҳратбек Каримов ва унинг қурилиш компаниясига қарши қўзғатилган жиноят ишида тўпланган материаллар уни дахлсизлик ҳуқуқидан маҳрум қилиш учун етарли асос бўлганлигини таъкидлади.
21 май куни шаҳар прокурори Қурбонали Асқаров ўз аризасига биноан истеъфога чиқди. Бош прокуратура ҳисоботида таъкидланишича, ишдан бўшатиш Андижон шаҳар кенгаши сессиясида бўлиб ўтган воқеалар билан боғлиқ эмас.
18 май куни Сенатнинг маҳаллий ҳокимият вакиллик органлари фаолиятига кўмаклашувчи комиссияси ушбу тадбирларни ўрганишни бошлаганлигини эълон қилди.
«Gazeta.uz»нинг Олий Мажлис юқори палатасига таяниб хабар қилишича, суд-ҳуқуқий масалалар ва коррупцияга қарши курашиш қўмитаси раисининг ўринбосари Шуҳрат Чуллиев ва сенатор Фарҳод Бакиев бошчилигидаги қўшимча ишчи гуруҳ вилоятга жўнаб кетган.
Қонунчилик палатаси депутатининг фикри
Олий Мажлис Қонунчилик палатаси депутати, ЎзЛиДеП фракцияси аъзоси Расул Кушербаевнинг фикрига кўра, ушбу мурожаатни Андижон депутатларининг маҳаллий раҳбарларга, шу жумладан, ҳокимга нисбатан билдирган норасмий ишончсизлик вотуми сифатида қараш мумкин.
«Ушбу ҳолат яна бир бор депутатларнинг туман ва шаҳар ҳокимларига нисбатан ишончизлик вотуми билдира олиши нима учун зарурлигини кўрсатиб турибди. Демак, буни қонунларда ҳам қатъий мустаҳкамлаб қўйиш вақти аллақачон келган. Токи ҳоким ҳақиқатда кенгашга ҳисобдор бўлиши, халқ вакилларига беписандлик қилмаслиги, қонунларни бузмаслиги учун», — деди парламент аъзоси.
Унинг фикрига кўра, бу ҳолат «кучларнинг бир бўғинда ҳаддан ташқари тўпланиши» билан боғлиқ.
«Оқибат эса бу айрим ҳокимларнинг қонунсиз ҳаракат қилиб, ўзини ‘мутлақ ҳукмдор» сифатида тутишигача олиб келмоқда. Бу ёмон. Бир ҳақиқат равшанлашиб боряпти: депутатлар ўз иш фаолиятини халқ манфаати йўлида олиб бориши учун дахлсизлиги ва хавфсизлиги амалда тўлиқ таъминланмас экан, фуқаролик жамиятини қуриш, деган гаплар қоғозда қолиб кетаверади», — деди Кушербаев.
Изоҳ (0)