Porsche kompaniyasi Nyu-Yorkda bo‘lib o‘tadigan moda haftaligiga Amerikaning Aime Leon Dore (ALD) moda leybli bilan birgalikda qayta tiklangan noyob Porsche 911 SC’ni tayyorladi. Ikki eshikli modelning o‘ziga xos jihatlari qatoridan ko‘plab retro-detallar, jumladan, naqshinkor gilamchalar va o‘rindiq uchun massaj qoplama o‘rin olgan, deb xabar beradi Motor.
SC indeksli Porsche 911 modeli 1978-yildan 1983-yilga qadar ishlab chiqarilgan, ammo ushbu nusxa aynan qaysi yilda yig‘ilgani noma’lum. ALD kreativ direktori Teddi Santisning so‘zlariga ko‘ra, loyiha juda shaxsiy ko‘rinish olgan: u Gretsiya orollarida o‘tkazgan bolalagi xotiralari hamda vaqt o‘tishi bilan yaxshilanib borgan o‘zini o‘rab turgan predmetlardan ilhomlangan.
Santis mashinaning ehtiyot qismlariga alohida e’tibor qaratgan. Avtomobilning tom qismiga yukbo‘lma o‘rnatilgan, kapotida qo‘shimcha optika paydo bo‘lgan, kuzovi Porsche Olive rangiga bo‘yalgan. Bundan tashqari, kupe qora Fuchs g‘ildirak diskalariga ega bo‘lgan, Porsche’ning ta’kidlashicha, u “ideal bo‘lmagan yo‘llarda ham” harakatlana oladi.
Salonning pol qismiga to‘shalgan, shuningdek, eshik kartlari yopishtirilgan naqshinkor gilamchalar uning o‘ziga xosligini ta’minlaydi. Butun salon, jumladan, Recaro charm o‘rindiqlari ham yaxshilab restavratsiya qilingan, haydovchi o‘rindig‘i esa yana bir nostalgiya detaliga — yog‘och sharchalardan ishlangan massaj qoplamaga ega bo‘lgan.
Qayta tiklangan Porsche 911 SC o‘tgan dam olish kunlari ALD’ning Manxettendagi do‘koniga qo‘yilgan. Bu leybl hamda Porsche’ning hamkorlikdagi ilk loyihasi emas: o‘tgan yili dizaynerlar Porsche 911 Carrera 4’ning o‘ziga xos versiyasini taqdim etgandi.
Avvalroq Porsche juda tez harakatlanishga ham bardoshli mashina tom qismiga o‘rnatiladigan yukbo‘lmani yaratgani, Poyga uchun mo‘ljallangan Porsche’ning maketi haqiqiy Cayenne narxida sotuvga qo‘yilishi, Porsche yo‘ltanlamas universali va elektrovelosipedlarini namoyish etgani to‘g‘risida xabar berilgandi.
Izoh (0)