Porsche компанияси Нью-Йоркда бўлиб ўтадиган мода ҳафталигига Американинг Aime Leon Dore (ALD) мода лейбли билан биргаликда қайта тикланган ноёб Porsche 911 SC’ни тайёрлади. Икки эшикли моделнинг ўзига хос жиҳатлари қаторидан кўплаб ретро-деталлар, жумладан, нақшинкор гиламчалар ва ўриндиқ учун массаж қоплама ўрин олган, деб хабар беради Motor.
SC индексли Porsche 911 модели 1978 йилдан 1983 йилга қадар ишлаб чиқарилган, аммо ушбу нусха айнан қайси йилда йиғилгани номаълум. ALD креатив директори Тедди Сантиснинг сўзларига кўра, лойиҳа жуда шахсий кўриниш олган: у Греция оролларида ўтказган болалаги хотиралари ҳамда вақт ўтиши билан яхшиланиб борган ўзини ўраб турган предметлардан илҳомланган.
Сантис машинанинг эҳтиёт қисмларига алоҳида эътибор қаратган. Автомобилнинг том қисмига юкбўлма ўрнатилган, капотида қўшимча оптика пайдо бўлган, кузови Porsche Olive рангига бўялган. Бундан ташқари, купе қора Fuchs ғилдирак дискаларига эга бўлган, Porsche’нинг таъкидлашича, у «идеал бўлмаган йўлларда ҳам» ҳаракатлана олади.
Салоннинг пол қисмига тўшалган, шунингдек, эшик картлари ёпиштирилган нақшинкор гиламчалар унинг ўзига хослигини таъминлайди. Бутун салон, жумладан, Recaro чарм ўриндиқлари ҳам яхшилаб реставрация қилинган, ҳайдовчи ўриндиғи эса яна бир носталгия деталига — ёғоч шарчалардан ишланган массаж қопламага эга бўлган.
Қайта тикланган Porsche 911 SC ўтган дам олиш кунлари ALD’нинг Манхэттендаги дўконига қўйилган. Бу лейбл ҳамда Porsche’нинг ҳамкорликдаги илк лойиҳаси эмас: ўтган йили дизайнерлар Porsche 911 Carrera 4’нинг ўзига хос версиясини тақдим этганди.
Аввалроқ Porsche жуда тез ҳаракатланишга ҳам бардошли машина том қисмига ўрнатиладиган юкбўлмани яратгани, Пойга учун мўлжалланган Porsche’нинг макети ҳақиқий Cayenne нархида сотувга қўйилиши, Porsche йўлтанламас универсали ва электровелосипедларини намойиш этгани тўғрисида хабар берилганди.
Изоҳ (0)