Toshkent shahar hokimligi tadbirkorga tegishli bo‘lgan binoni buzgan va 4 milliard so‘m qarzdor bo‘lgan. Bu haqda Prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil matbuot xizmati xabar qildi.
Qayd etilishicha, “L.” MChJ (nomi o‘zgartirilgan) uning mulk huquqlari buzilganligidan norozi bo‘lib, biznes-ombudsmanga murojaat qilgan.
Aniqlanishicha, hokimning qarori bilan yer maydoni davlat va jamoat ehtiyojlari uchun olinganligi natijasida tadbirkorga tegishli 87 kvadrat metrlik savdo do‘koni buzilgan.
Ushbu mulk mustaqil baholovchi korxona tomonidan qariyb 4 milliard so‘mga baholangan. Shu bilan birga, tadbirkor tomonidan kompensatsiyani to‘lab berish to‘g‘risidagi murojaat Toshkent shahar hokimligiga yuborilganligiga qaramay, kompensatsiya to‘lanmagan.
Biznes-ombudsman tomonidan Toshkent tumanlararo iqtisodiy sudiga kiritilgan da’vo arizasi natijasida Toshkent shahar hokimligiga “L” MChJga qariyb 4 milliard so‘m kompensatsiya to‘lab berish vazifasi yuklatildi.
Bundan avval Toshkentda hokimning “maxfiy” qarori bilan do‘koni buzilgan tadbirkorga kompensatsiya to‘lanadigan bo‘lgani hamda biznes-ombudsman Toshkentdagi reklama bannerlarining buzib yuborilishi qonuniyligini o‘rgangani haqida xabar berilgandi.
Izoh (0)