Turkiyaning Antaliya shahrida O‘zbekistonning faxriy konsulxonasi ochildi. Mamlakatning faxriy konsuli etib Barish Go‘kche tayinlandi. 23-may kuni unga konsullik guvohnomasi va akkreditsiya kartalari topshirildi, deb xabar bermoqda “Dunyo” AA.
Ochilish marosimida O‘zbekistonning Turkiyadagi elchisi Alisher A’zamxo‘jayev, Antaliya hokimi o‘rinbosari, biznes va jamoatchilik vakillari ishtirok etgan.
“Faxriy konsul bilan O‘zbekistonning iqtisodiy manfaatlarini ilgari surish, respublikaga Turkiya investitsiyalarini jalb qilish, mahalliy mahsulotlarni Antaliya va Turkiya bozorlariga eksport qilishda ko‘maklashish, madaniy-gumanitar va boshqa aloqalarni rivojlantirish masalalari muhokama qilindi”, — deyiladi xabarda.
“Gazeta.uz”ning qayd etishicha, Vazirlar Mahkamasi Turkiyaning Antaliya, Adana va Bursa shaharlarida O‘zbekistonning faxriy konsullari tayinlanishi masalasini ko‘rib chiqishni 2020-yil 18-avgustidagi qarorida topshirgandi.
“O‘zbekiston Respublikasining konsullik ustavini tasdiqlash to‘g‘risida”gi qonunga ko‘ra, konsullik muassasasi joylashgan davlatda munosib ijtimoiy mavqeni egallagan va zarur shaxsiy fazilatlarga ega, shuningdek, zimmasiga yuklatilgan konsullik funksiyalarini lozim darajada bajarish imkoniyatiga ega shaxslardan bo‘lgan O‘zbekiston fuqarosi ham, chet el fuqarosi ham faxriy konsul bo‘lishi mumkin.
Faxriy konsul xorijda doimiy yashayotgan O‘zbekiston fuqarolarining hisobini yuritish, O‘zbekiston hududidan tashqarida O‘zbekiston fuqarolari hamda yuridik shaxslarining huquqlari va qonuniy manfaatlarini himoya qilish kabi konsullik funksiyalarini bajarishi mumkin.
Izoh (0)