Туркиянинг Анталия шаҳрида Ўзбекистоннинг фахрий консулхонаси очилди. Мамлакатнинг фахрий консули этиб Бариш Гўкче тайинланди. 23 май куни унга консуллик гувоҳномаси ва аккредиция карталари топширилди, деб хабар бермоқда «Дунё» АА.
Очилиш маросимида Ўзбекистоннинг Туркиядаги элчиси Алишер Аъзамхўжаев, Анталия ҳокими ўринбосари, бизнес ва жамоатчилик вакиллари иштирок этган.
«Фахрий консул билан Ўзбекистоннинг иқтисодий манфаатларини илгари суриш, республикага Туркия инвестицияларини жалб қилиш, маҳаллий маҳсулотларни Анталия ва Туркия бозорларига экспорт қилишда кўмаклашиш, маданий-гуманитар ва бошқа алоқаларни ривожлантириш масалалари муҳокама қилинди», — дейилади хабарда.
«Gazeta.uz»нинг қайд этишича, Вазирлар Маҳкамаси Туркиянинг Анталия, Адана ва Бурса шаҳарларида Ўзбекистоннинг фахрий консуллари тайинланиши масаласини кўриб чиқишни 2020 йил 18 августидаги қарорида топширганди.
«Ўзбекистон Республикасининг консуллик уставини тасдиқлаш тўғрисида»ги қонунга кўра, консуллик муассасаси жойлашган давлатда муносиб ижтимоий мавқени эгаллаган ва зарур шахсий фазилатларга эга, шунингдек, зиммасига юклатилган консуллик функцияларини лозим даражада бажариш имкониятига эга шахслардан бўлган Ўзбекистон фуқароси ҳам, чет эл фуқароси ҳам фахрий консул бўлиши мумкин.
Фахрий консул хорижда доимий яшаётган Ўзбекистон фуқароларининг ҳисобини юритиш, Ўзбекистон ҳудудидан ташқарида Ўзбекистон фуқаролари ҳамда юридик шахсларининг ҳуқуқлари ва қонуний манфаатларини ҳимоя қилиш каби консуллик функцияларини бажариши мумкин.
Изоҳ (0)