Janubiy Koreyaning Samsung kompaniyasi o‘rta budjetli smartfoni — Galaxy F52’ni taqdim etdi, deb xabar beradi “Afisha.uz”.
Yangi qurilma Full HD+ sifat hamda 120 gertsli yangilanish chastotasini qo‘llab-quvvatlaydigan 6,6 dyuymli TFT-ekran bilan jihozlangan. Old panelning o‘ng burchagidagi qirqimda 16 megapikselli frontal kamera joylashgan, barmoq izi skaneri esa quvvatlantirish tugmasida.
Smartfonning asosiy kameralari to‘rtta: ikkita foydali modul — 64 megapikselli asosiy datchik va 8 megapikselli keng burchakli, shuningdek, har biri 2 megapikselldan bo‘lgan ikkita qo‘shimcha datchik.
Galaxy F52 ichiga Snapdragon 750G protsessori, 8 gigabayt tezkor va 128 gigabayt ichki xotira o‘rnatilgan. Ichki xotirani microSD yordamida 1 terabaytgacha ko‘tarish mumkin. Akkumulyator sig‘imi 4500 mA/soat, 25 vattli tezkor quvvatlanish funksiyasiga ega.
Xitoyda Samsung Galaxy F52 oq va qora ranglarda 310 dollar narxida sotuvga chiqadi.
Avvalroq Samsung Galaxy S20 va Note20 xuddi Galaxy S21’dagi kabi yangi suratga olish funksiyasiga ega bo‘lgani, Samsung Galaxy S22 200 megapikselli kameraga ega birinchi smartfonga aylangani to‘g‘risida xabar berilgandi.
Izoh (0)