UzAutoMotors yangi Chevrolet Tahoe High Country avtomobilini O‘zbekistonga import qila boshladi. Bu haqda 26-avgust kuni Toshkent shahrida o‘tkazilgan taqdimot marosimidan “Daryo” muxbiri xabar berdi.
Avtomobil 6,2 litr hajmli dvigatel, 420 ot kuchiga ega. Sakkiz soniyada 100 km/soat tezlikka chiqa qoladi.

Tahoe avvalgidan kattaroq — 24 dyuymli g‘ildiraklar bilan jihozlangan. Avtomobil yangilangan radiator panjarasi, animatsion chiroqlar va panoramali tom bilan ta’minlangan. Unga avtomatik ravishda chiqadigan zinapoyalar va yukxona eshigini kontaktsiz ochish tizimi o‘rnatilgan.
Yetti o‘rinli salon charm qoplamali o‘rindiqlar bilan jihozlangan bo‘lib, ularda isitish tizmi mavjud.
Haydovchi o‘rindig‘i sakkiz yo‘nalishda elektron tarzda sozlanadi, favqulodda vaziyatlarda vibratsion tebranishli qayta aloqa tizimi mavjud.

Mashinada 11 dyuymli displeyga ega raqamli qurilmalar paneli, Head-Up proyeksion displeyi bor. Shu bilan birga, smartfonlarni ulash standartlarini to‘liq qo‘llab-quvvatlaydigan 17,7 dyumli (avvalgisi 8 dyumli) sensorli ekranga ega axborot-ko‘ngilochar tizim o‘rnatilgan.
O‘z navbatida old to‘qnashuv haqida ogohlantirish bilan avtomatik favqulodda tormozlash funksiyasi, harakatlanish bo‘lagini saqlash tizimi, moslashuvchan kruiz-nazorati, yuqori aniqlikdagi atrofni ko‘rish kameralari bor.
Sotuvlar 2025-yil 11-sentyabrda boshlanishi rejalashtirilgan. Yangi Chevrolet Tahoe 2025 High Country avtomobili uch xil rangda savdoga chiqariladi: oq, qora, to‘q ko‘k. Uning narxi 1 milliard 464 million 500 ming so‘mni tashkil etadi. Mazkur avtomobildan yiliga 250-300 dona sotish rejalashtirilgan.
Izoh (0)