O‘zbekistonda joriy yilning 7 oyida 515 mingdan ortiq ijara shartnomalari hisobga qo‘yildi. Bu haqda Soliq qo‘mitasi xabar qildi.
Maʼlumotlarga ko‘ra, shartnomalar bo‘yicha 600 milliard so‘mga yaqin soliqlar hisoblangan.
Bunda 356,1 mingta ijara shartnomasi jismoniy shaxslar o‘rtasida tuzilgan bo‘lib, 445 milliard so‘mlik daromad solig‘i hisoblangan. Ushbu ko‘rsatkichlarda 2024-yilning mos davriga qaraganda ijara shartnomalari soni 9,1 foiz, hisoblangan daromad solig‘i summasi esa 46,6 foizga oshgan.
Yuridik shaxslar o‘rtasida tuzilgan ijara shartnomalari soni 159,1 mingtani tashkil etgan va 154,5 milliard so‘m soliq hisoblangan. Bu o‘tgan yilning mos davriga nisbatan shartnomalar sonida 14,1 foiz hamda soliq summasida 34,7 foiz o‘sish bo‘lganini ko‘rsatadi.
Shu bilan birga, 2025-yilning yanvar iyul oylarida talabalar bilan 65,3 mingdan ortiq ijara shartnomasi tuzilgan va ijarachilariga umumiy 40,7 milliard so‘m daromad solig‘idan imtiyoz berilgan. O‘zbekistonda ijarada turuvchi talabalar soni esa 95 307 nafarni tashkil etgan.
Taʼkidlash joiz, uy-joylarini talabalarga ijaraga bergan soliq to‘lovchilar daromadlari soliqdan ozod etilgan.
Izoh (0)