Xiaomi kompaniyasi hozirga qadar butun dunyo bo‘ylab Redmi Note seriyasidagi smartfonlarning 200 milliondan ortiq modelini sotganini ma’lum qildi. Smartfonlarning turli avlodlari savdosi bo‘yicha alohida ma’lumotlar keltirilmagan, deb xabar beradi IXBT.
2020-yilning noyabrida kompaniya Redmi Note seriyasi savdolari 140 million donadan oshganini ma’lum qilgandi. Bundan kelib chiqadiki, yarim yil ichida Xiaomi yana 60 million smartfon sotgan — oyiga 10 million donadan.
Xiaomi’ning hisoblashicha, Redmi Note seriyasining bu qadar ommalashishiga brendning eng yaxshi texnologiyalarga ega mahsulotlarni hamyonbop narxlarda taklif etish borasidagi strategiyasi sabab bo‘lmoqda.
Redmi Note seriyasi 2014-yildan buyon bozorda. 2019-yilda Redmi Note 7 seriyasini taqdim etish vaqtida Redmi alohida mustaqil brendga aylangani e’lon qilingandi. 26-may kuni yangi Redmi Note 10 smartfonlari taqdim etiladi.
Xiaomi so‘nggi yillarda sezilarli darajada o‘sishni amalga oshirdi va hozirda Xitoy kompaniyasi dunyo bo‘ylab eng ko‘p smartfon sotadiganlar qatorida Samsung va Apple’dan keyingi o‘rinni egallagan.
Ma’lumot uchun, 2021-yilning dastlabki uch oyi ichida butun dunyo bo‘ylab Janubiy Koreyaning Samsung kompaniyasi eng ko‘p smartfon sotishga muvaffaq bo‘lgan — 77 million dona (bu bozorning 23 foizi demak).
Izoh (0)