O‘zbekistonning tashqi savdo aylanmasi 2021-yil yanvar–aprel oylari yakunlari bo‘yicha 10,3 milliard dollarni tashkil etib, 2020-yilning shu davriga nisbatan 378 million dollarga yoki 3,5 foizga kamaydi. Bu haqda Davlat statistika qo‘mitasi hisobotida qayd etilgan.
Eksport 3,5 milliard dollarni tashkil etdi (19,1 foizga kamaydi). Import 7 foizga oshib, 6,8 milliard dollarga yetdi. Natijada 3,3 milliard dollar qiymatida passiv tashqi savdo balansi qayd etildi.
Bunda eksport oltinni hisobga olmaganda 26,7 foizga oshdi. O‘zbekiston 8 oydan beri oltin eksport qilmayapti. So‘nggi marta 2020-yilning avgust oyida oltin sotilgan. Markaziy bank narxlar ko‘tarilgach, O‘zbekiston oltin eksportini davom ettirishini ma’lum qilgandi.
Tashqi savdo aylanmasining nisbatan salmoqli hissasi Xitoy (20,5 foiz), Rossiya (17,8 foiz), Qozog‘iston (11,8 foiz), Turkiya (9,3 foiz), Janubiy Koreya (4,8 foiz), Qirg‘iziston (2,4 foiz) va Afg‘oniston (2,3 foiz) bilan qayd etilgan.
Tashqi iqtisodiy faoliyat bo‘yicha 20 ta yirik hamkor davlatlar orasidan oltita davlatda faol tashqi savdo balansi kuzatilgan, xususan, Afg‘oniston, Qirg‘iz Respublikasi, Tojikiston, Turkiya, Kanada va Eron shular jumlasidandir. Qolgan 14 ta davlat bilan passiv tashqi savdo balansi saqlanib qolmoqda.
Shuningdek, 2021-yilning yanvar–aprel oylarida savdoning 39,3 foizi MDH davlatlariga to‘g‘ri kelib, 2020-yilning mos davriga nisbatan 4,9 foizga ko‘paygan.
Avvalroq yanvar–aprel oylarida O‘zbekiston korxonalari tomonidan ofshor hududlarga to‘lovlarni amalga oshirgan holda 103 million dollarlik mahsulot import qilingani haqida xabar berilgan edi. Ofshor hududlarga pul o‘tkazish orqali amalga oshirilgan import hajmlarining asosiy ulushi Toshkent shahriga to‘g‘ri kelgan (33 million dollar). Kompaniyalar dori vositalari, maxsus texnikalar, asbob-uskunalar, neft mahsulotlarini import qilgan.
Izoh (0)