Navoiyda tadbirkorlarga beg‘araz yordam sifatida 18-may kuni 37 dona ishlab chiqarish qurilmalari va maxsus uskunalar bepul topshirildi. Bu haqda Bandlik va mehnat munosabatlari vazirligi matbuot xizmati xabar berdi.
Ma’lum qilinishicha, qurilmalar Bandlik va mehnat munosabatlari vazirligi va BMT Taraqqiyot dasturining “O‘zbekistonda yoshlar bandligiga ko‘maklashish” qo‘shma loyihasi doirasida amalga oshirilayotgan kichik biznesni qo‘llab-quvvatlash dasturining Navoiy viloyatidan saralab olingan tadbirkorlarga berilgan.
Bu Navoiy viloyatida ayollar va yoshlar uchun 24 ta yangi ish o‘rinlarini yaratishga yordam beradi, shuningdek, 21 nafar fuqarolarga zamonaviy kasb-hunarlarni o‘rganish hamda tadbirkorlik qobiliyatlarini rivojlantirish imkoniyatini yaratadi.
“Gazeta.uz”ning yozishicha, tadbirkorlarning tanlab olingan loyihalari qatoriga o‘quv markazini yaratish, bolalar uchun mahsulotlar ishlab chiqarish, tikuvchilik korxonasini yaratish, oziq-ovqat va dori-darmon yetkazib berish xizmatini tashkil etish va boshqalar kiradi.
Ushbu tashabbus ishtirokchilari ayollar va yoshlar uchun yaratiladigan yangi ish o‘rinlari soni, kelajakda loyihaning imkoniyatlari kabi mezonlar bo‘yicha tanlov asosida tanlab olindi.
Umuman olganda, Rossiya tomonidan moliyalashtiriladigan “O‘zbekistonda yoshlar bandligini ta’minlashga ko‘maklashish” loyihasi doirasida va Yaponiya hukumatining moliyaviy ko‘magi bilan olti hudud: Andijon, Namangan, Jizzax, Navoiy, Qashqadaryo va Surxondaryo viloyatlaridan 34 nafar tadbirkorga (shundan 21 nafari yoki 62 foizi ayollar) uskunalar berilmoqda. Ular 1,3 milliard so‘mga 323 dona tikuv va IT-uskunalari, mebel va maishiy texnika oladi. Natijada 187 ta yangi ish o‘rinlari ochilishi kutilmoqda, ularning 132 tasi (yoki 70 foizdan ortig‘i) ayollar uchun.
Izoh (0)