Samarqand shahrida uyda singlisi bilan yolg‘iz qoldirilgan 4 yoshli bola xonadon derazasidan oshib o‘tdi, deya xabar bermoqda viloyat IIBB.
Ma’lum qilinishicha, 21-may kuni soat 17:15 lar atrofida Samarqand shahrining Mirzo Ulug‘bek ko‘chasida joylashgan ko‘p qavatli uylarning birida yashovchi K.N. 4 yoshli farzandini singlisi bilan yolg‘iz qoldirib, yumushlari bilan ko‘chaga chiqib ketadi.
Bu vaqtida bolakay ko‘chaga deraza orqali chiqishga harakat qilgan va derazadan oshib o‘tgan. Holatni shu yerdagi do‘kon egalari hamda ko‘chadan o‘tayotgan fuqarolar ko‘rib qolib, bolakayni derazadan olib, onasiga sog‘-salomat topshirishgan.
Samarqand viloyati IIB xodimlari K.N.ning yashash uyiga tashrif buyurib, u bilan kelgusida bu kabi holatlarga yo‘l qo‘ymaslik, farzandlariga e’tiborli bo‘lish lozimligi borasida profilaktik suhbat o‘tkazib, ogohlantirgan.
Bundan avval Chirchiqda 5 yoshli bola 2 yoshli bolani yiqitib yuborgani uchun bolalarning onalari va buvilari o‘zaro janjallashgani, Sirdaryoda maktab oldidagi piyodalar yo‘lagidan o‘tayotgan 2-sinf o‘quvchisi yuk mashinasi urib ketishi oqibatida vafot etgani hamda Navoiyda 3 yoshli farzandini 60 mln so‘mga sotmoqchi bo‘lgan ayol ushlangani haqida xabar berilgandi.
Izoh (0)