Ўзбекистон ташқи савдо айланмаси январь–апрель ойларида 378 млн долларга камайди

Ўзбекистоннинг ташқи савдо айланмаси 2021 йил январь–апрель ойлари якунлари бўйича 10,3 миллиард долларни ташкил этиб, 2020 йилнинг шу даврига нисбатан 378 миллион долларга ёки 3,5 фоизга камайди. Бу ҳақда Давлат статистика қўмитаси ҳисоботида қайд этилган.

Экспорт 3,5 миллиард долларни ташкил этди (19,1 фоизга камайди). Импорт 7 фоизга ошиб, 6,8 миллиард долларга етди. Натижада 3,3 миллиард доллар қийматида пассив ташқи савдо баланси қайд этилди.

Бунда экспорт олтинни ҳисобга олмаганда 26,7 фоизга ошди. Ўзбекистон 8 ойдан бери олтин экспорт қилмаяпти. Сўнгги марта 2020 йилнинг август ойида олтин сотилган. Марказий банк нархлар кўтарилгач, Ўзбекистон олтин экспортини давом эттиришини маълум қилганди.

Ташқи савдо айланмасининг нисбатан салмоқли ҳиссаси Хитой (20,5 фоиз), Россия (17,8 фоиз), Қозоғистон (11,8 фоиз), Туркия (9,3 фоиз), Жанубий Корея (4,8 фоиз), Қирғизистон (2,4 фоиз) ва Афғонистон (2,3 фоиз) билан қайд этилган.

Ташқи иқтисодий фаолият бўйича 20 та йирик ҳамкор давлатлар орасидан олтита давлатда фаол ташқи савдо баланси кузатилган, хусусан, Афғонистон, Қирғиз Республикаси, Тожикистон, Туркия, Канада ва Эрон шулар жумласидандир. Қолган 14 та давлат билан пассив ташқи савдо баланси сақланиб қолмоқда.

Шунингдек, 2021 йилнинг январь–апрель ойларида савдонинг 39,3 фоизи МДҲ давлатларига тўғри келиб, 2020 йилнинг мос даврига нисбатан 4,9 фоизга кўпайган.

Аввалроқ январь–апрель ойларида Ўзбекистон корхоналари томонидан офшор ҳудудларга тўловларни амалга оширган ҳолда 103 миллион долларлик маҳсулот импорт қилингани ҳақида хабар берилган эди. Офшор ҳудудларга пул ўтказиш орқали амалга оширилган импорт ҳажмларининг асосий улуши Тошкент шаҳрига тўғри келган (33 миллион доллар). Компаниялар дори воситалари, махсус техникалар, асбоб-ускуналар, нефть маҳсулотларини импорт қилган.