Qoraqalpog‘istonning Bo‘zatov, Qorauzoq va Chimboy tumanlaridan bo‘lgan sakkiz nafar fermerga asalarichilikni rivojlantirish uchun 80 ta asalari uyasi topshirildi. Inventarlarni topshirish marosimi Nukus tumanida bo‘lib o‘tgan. Shuningdek, fermerlar asalarichi Baxtiyor Jo‘raboyevning master-klassida ishtirok etgan. Bu haqda BMT Taraqqiyot dasturi matbuot xizmatiga tayanib, “Gazeta.uz” xabar berdi.
Fermerlar loyihasini BMT Taraqqiyot dasturi va BMTning Aholishunoslik jamg‘armasining (UNFPA) tanlov komissiyasi tasdiqlagan. Yaponiya hukumati tomonidan moliyalashtirilgan tanlov tashkilotlar tomonidan fevral oyida “Orol dengizi mintaqasidagi mahalliy hamjamiyatlarning ekologik, iqtisodiy zaifliklari, shuningdek, aholi salomatligi masalalariga chidamliligini kuchaytirish” qo‘shma dasturi doirasida o‘tkazilgan. Hamkorlikda moliyalashtirish uchun jami 27 ta biznes-loyiha tasdiqlangan.
“Murakkab ekologik va iqtisodiy vaziyatga ega mintaqa uchun asalarichilikning o‘ziga xos ahamiyati mavjud. Bu shunchaki barqaror daromad olib keladigan biznes bo‘libgina qolmay, atrof-muhitni yaxshilash, ekologik tozalik va sog‘lik uchun foydali mahsulotlardan foydalanish imkonini berishga sarmoya kiritishdir… Chunki asalarichi asaldan tashqari, mum, propolis oladi, omadi kelsa, farmkompaniyalar uchun zarur bo‘lgan asalari zaharini sotishni yo‘lga qo‘yishi mumkin”, — deyiladi xabarda.
Asalarilar kuni har yili 20-may sanasida nishonlanadi. Ta’kidlanishicha, ushbu bayram asalarilar va boshqa changlatuvchilarning ahamiyati, ular duch keladigan tahdidlar va ularning barqaror rivojlanishga qo‘shadigan hissasi to‘g‘risida xabardorlikni oshirishga xizmat qiladi.
Izoh (0)