O‘zbekistonda emlangan fuqarolar niqob taqishga majbur emasligi haqida xabarlar tarqaldi. Bunga SSV izoh berdi

Ijtimoiy tarmoqlarda O‘zbekistonda emlangan fuqarolarga niqob taqmaslikka ruxsat berilishi to‘g‘risida ma’lumotlar tarqatilmoqda. Bunga Sog‘liqni saqlash vazirligi izoh berib o‘tdi.

Qayd etilishicha, Koronavirusga qarshi kurashish shtabi a’zosi Sevara Ubaydullayevaning koronavirusga oid savollar yuzasidan o‘tkazilgan brifingda bergan javobi ushbu xabarlar tarqalishiga asos qilib ko‘rsatilmoqda.

Aslida, mutaxassis ayrim davlatlarda aholining 60-70 foizi to‘liq emlanganidan keyingina vaksina qabul qilganlar niqobsiz yurishi va ijtimoiy masofani saqlamasligi mumkin bo‘lgani haqida aytgan.

“Holbuki, yurtimizda dastlab 4 million nafarga yaqin xavf guruhiga kiruvchi fuqarolar emlanishi ko‘zda tutilgan. 34 million nafardan oshiq fuqaro yashaydigan mamlakatda aholi niqobsiz yurishi uchun kamida 15 million nafardan ortiq kishi emlanishi kerakligi — oddiy arifmetika.

Shuning uchun emlanganlar niqobsiz yurishi haqidagi mish-mishlar haqiqatga zid bo‘lib, jamoat joylarida tibbiy niqobdan foydalanish tartiblariga amal qilish barcha uchun majburiy”, – deyiladi SSV xabarida.

Bundan tashqari, ushbu xabarlar yuzasidan Sevara Ubaydullayeva ham izoh berib o‘tdi.

“Hozirda fuqarolarning tibbiyot niqobisiz harakatlanishiga Respublika maxsus komissiyasi tomonidan ruxsat berilganicha yo‘q.

O‘zbekiston Respublikasining Ma’muriy javobgarlik to‘g‘risidagi kodeksining 54-moddasida epidemiyalarga qarshi kurash qoidalarini buzganlik uchun javobgarlik choralari belgilangan.

Ushbu moddaga ko‘ra, karantinli va inson uchun xavfli bo‘lgan boshqa yuqumli kasalliklar paydo bo‘lishi hamda tarqalishi sharoitida vakolatli organning maxsus talablariga zid ravishda jamoat joylarida niqobsiz bo‘lish bazaviy hisoblash miqdorining 5 baravarigacha (1 million 225 ming so‘m) miqdorda jarima solishga sabab bo‘ladi.

Shu sababli fuqarolarimizga jamoat joylarida tibbiyot niqoblarida bo‘lishini maslahat bergan bo‘lardik. Shuningdek, fuqarolarimizdan asoslanmagan yolg‘on axborotlarni tarqatmasliklarini so‘rab qolgan bo‘lardik”, – deydi Sevara Ubaydullayeva.