O‘zbekiston va BAA o‘rtasida aviareyslar soni oshiriladi

O‘zbekiston Transport vazirligida 19–20-may kunlari BAA aviatsiya ma’muriyati vakillari bilan o‘tkazilgan uchrashuvda ikki mamlakat o‘rtasida parvozlar chastotasini ko‘paytirish, yangi yo‘nalishlarda aviaqatnovlarni yo‘lga qo‘yish masalalari muhokama qilindi.

Maslahatlashuvlar yakunlari bo‘yicha erishilgan kelishuvlarga ko‘ra, FlyDubai aviakompaniyasi Dubay—Toshkent—Dubay yo‘nalishida parvozlar chastotasini haftasiga 5 tadan 6 ta reysga oshiradi.

Air Arabia PJSC esa Sharja–Toshkent–Sharja yo‘nalishida parvozlar chastotasini haftasiga 2 tadan 3 ta reysga ko‘paytiradi.

Air Arabia Abu Dhabi aviakompaniyasi Abu-Dabi—Toshkent—Abu-Dabi yo‘nalishida parvozlarni haftasiga 2 tadan 4 taga oshiradi.

Shuningdek, Wizz Air Abu Dhabi aviakompaniyasiga Buxoro va Urganch shaharlariga parvozlarni amalga oshirish huquqi berildi.

Bundan avval Uzbekistan Airways AJ Yaponiyaga reyslarni vaqtincha bekor qilayotgani, Saudiya Arabistonining Flynas aviakompaniyasi O‘zbekistonga muntazam qatnovlarni amalga oshirishni rejalashtirilayotgani hamda Uzbekistan Airways Surxondaryodan Farg‘onaga muntazam aviaqatnovlarni yo‘lga qo‘ygani haqida xabar berilgandi.