O‘zbekiston Prezidenti Shavkat Mirziyoyev 21-may kuni videoanjuman shaklida o‘tgan Yevrosiyo iqtisodiy kengashining navbatdagi yig‘ilishida ishtirok etdi. Bu haqda Prezident matbuot xizmati xabar berdi.
Qozog‘iston prezidenti Qosim-Jo‘mart To‘qayev raisligida o‘tgan Oliy kengashning navbatdagi yig‘ilishida kengash faxriy raisi, Qozog‘istonning Birinchi prezidenti — elboshi Nursulton Nazarboyev, Armaniston bosh vaziri vazifasini bajaruvchisi Nikol Pashinyan, Belarus prezidenti Aleksandr Lukashenko, Qirg‘iziston prezidenti Sadir Japarov, Rossiya prezidenti Vladimir Putin, YeOII huzuridagi kuzatuvchi davlat — Kuba prezidenti Migel Bermudes va Yevrosiyo iqtisodiy komissiyasi hay’ati raisi Mixail Myasnikovich ham ishtirok etdi.
Tadbir kun tartibidan iqtisodiyotning turli tarmoqlarida amaliy hamkorlik qilish hamda YeOII faoliyatini takomillashtirishga doir dolzarb masalalar o‘rin oldi.
Shavkat Mirziyoyev o‘z nutqida hal etilishi o‘zaro muvofiqlashgan yondashuvlarni talab etuvchi eng muhim vazifalarga alohida to‘xtaldi.
Xususan, quyidagilar alohida qayd etildi:
- savdo munosabatlarini, shu jumladan, to‘siqlarni bartaraf etish va savdoni notarif tartibga solish choralarini yaqinlashtirish orqali yanada kengaytirish uchun salmoqli salohiyat mavjud;
- mamlakatlarning yetakchi korxonalari va hududlarning sanoat kooperatsiyasini mustahkamlash, Yevrosiyo taraqqiyot bankini jalb qilgan holda iqtisodiyotning real sektori tarmoqlarida hamda oziq-ovqat xavfsizligini ta’minlash bo‘yicha loyihalarni ilgari surish muhim ahamiyatga ega;
- transport-tranzit sohasidagi dolzarb masalalarni hal qilish va yuk tashish hajmini oshirish maqsadida o‘zaro imtiyozlarni kengaytirish lozim.
“Mamlakatlarimizda aholini emlash orqali amalga oshirilayotgan epidemiologik vaziyatning barqarorlashishini hisobga olib, biz havo va temir yo‘l yo‘lovchilarining muntazam qatnovini tiklash vaqti keldi, deb o‘ylaymiz” – dedi davlat rahbari.
Bundan tashqari, O‘zbekistonning YeOII soliq va bojxona ma’muriyatchiligi, sanoat, mehnat migratsiyasi va turizm bo‘yicha raqamli platformalariga ulanish imkoniyati ko‘rib chiqilmoqda, shuningdek, boshqa qator ustuvor yo‘nalishlar borasida hamkorlik qilish imkoniyatlari o‘rganilmoqda, deyiladi xabarda.
Prezident o‘z nutqida “hozirgi murakkab sharoitda yondashuvlarni muvofiqlashtirishni talab qiladigan” vazifalarni sanab o‘tdi. Ular orasidan YeOIIga a’zo va kuzatuvchi davlatlarning ilg‘or korxonalari va hududlarining tijoriy aloqalarini yo‘lga qo‘yish va sanoat kooperatsiyalarini jadal rivojlantirish o‘rin oldi.
“Biz iqtisodiyotning real sektorida, shuningdek oziq-ovqat xavfsizligini ta’minlashda hamkorlik qilish uchun katta imkoniyatlarni ko‘ryapmiz”, – deya qo‘shimcha qildi u.
O‘zbekiston prezidenti so‘zining yakunida kuzatuvchi davlat sifatida Yevrosiyo iqtisodiy ittifoqi bilan hamkorligida aniq va sezilarli natijalarga erishish muhim ekanini yana bir bor ta’kidladi.
“Yana bir bor ta’kidlayman, O‘zbekiston uchun kuzatuvchi sifatida YeOII bilan o‘zaro aloqalarning aniq, sezilarli natijalariga erishishni ta’minlash muhim. Ushbu maqsadlarda, jumladan, tovarlar, kapital, mehnat resurslari va xizmatlarning aylanish jarayonini soddalashtirish masalalari bo‘yicha tizimli hamkorlikni izchil rivojlantirish zarur deb hisoblaymiz. Ochiq va konstruktiv muloqotni kutmoqdamiz. Aminmanki, bunday sherikchilik yangi imkoniyatlarni ochadi, mamlakatlarimizning barqaror iqtisodiy rivojlanishi, xalqlarimiz farovonligining yuksalishiga qo‘shimcha turtki beradi”, — dedi u.
Eslatib o‘tamiz, O‘zbekiston Yevrosiyo iqtisodiy ittifoqi huzuridagi kuzatuvchi davlat maqomini ushbu tashkilotning 2020-yil 11-dekabrdagi sammitida olgan edi.
Bundan avval O‘zbekiston Yevropa Ittifoqiga bojxona bojisiz eksport qiladigan mahsulotlar qatori ikki barobarga oshgani, Investitsiyalar va tashqi savdo vazirligi tuzilmasida Rossiya bilan hamkorlik boshqarmasi tashkil etilgani hamda O‘zbekiston YeOII bilan investitsiyaviy hamkorlikni oshirishga tayyorligi haqida xabar berilgandi.
Izoh (0)