Ижтимоий тармоқларда Ўзбекистонда эмланган фуқароларга ниқоб тақмасликка рухсат берилиши тўғрисида маълумотлар тарқатилмоқда. Бунга Соғлиқни сақлаш вазирлиги изоҳ бериб ўтди.
Қайд этилишича, Коронавирусга қарши курашиш штаби аъзоси Севара Убайдуллаеванинг коронавирусга оид саволлар юзасидан ўтказилган брифингда берган жавоби ушбу хабарлар тарқалишига асос қилиб кўрсатилмоқда.
Аслида, мутахассис айрим давлатларда аҳолининг 60-70 фоизи тўлиқ эмланганидан кейингина вакцина қабул қилганлар ниқобсиз юриши ва ижтимоий масофани сақламаслиги мумкин бўлгани ҳақида айтган.
«Ҳолбуки, юртимизда дастлаб 4 миллион нафарга яқин хавф гуруҳига кирувчи фуқаролар эмланиши кўзда тутилган. 34 миллион нафардан ошиқ фуқаро яшайдиган мамлакатда аҳоли ниқобсиз юриши учун камида 15 миллион нафардан ортиқ киши эмланиши кераклиги — оддий арифметика.
Шунинг учун эмланганлар ниқобсиз юриши ҳақидаги миш-мишлар ҳақиқатга зид бўлиб, жамоат жойларида тиббий ниқобдан фойдаланиш тартибларига амал қилиш барча учун мажбурий», – дейилади ССВ хабарида.
Бундан ташқари, ушбу хабарлар юзасидан Севара Убайдуллаева ҳам изоҳ бериб ўтди.
«Ҳозирда фуқароларнинг тиббиёт ниқобисиз ҳаракатланишига Республика махсус комиссияси томонидан рухсат берилганича йўқ.
Ўзбекистон Республикасининг Маъмурий жавобгарлик тўғрисидаги кодексининг 54-моддасида эпидемияларга қарши кураш қоидаларини бузганлик учун жавобгарлик чоралари белгиланган.
Ушбу моддага кўра, карантинли ва инсон учун хавфли бўлган бошқа юқумли касалликлар пайдо бўлиши ҳамда тарқалиши шароитида ваколатли органнинг махсус талабларига зид равишда жамоат жойларида ниқобсиз бўлиш базавий ҳисоблаш миқдорининг 5 бараваригача (1 миллион 225 минг сўм) миқдорда жарима солишга сабаб бўлади.
Шу сабабли фуқароларимизга жамоат жойларида тиббиёт ниқобларида бўлишини маслаҳат берган бўлардик. Шунингдек, фуқароларимиздан асосланмаган ёлғон ахборотларни тарқатмасликларини сўраб қолган бўлардик», – дейди Севара Убайдуллаева.
Мавзуга доир:
Изоҳ (0)