Andijon viloyatida yoshlar siyosatini samarali amalga oshirish maqsadida respublika “Yoshlar forumi” o‘tkazilmoqda. Bu haqda forumda qatnashgan “Daryo” muxbiri Umidjon Mamarasulov xabar berdi.
Ta’kidlanishicha, forumda respublikaning barcha hududlaridan kelgan, turli sohalarda muvaffaqiyatlarga erishgan, ilm-ma’rifat, adabiyot, san’at, kasb-hunar, sport sohalarida qo‘lga kiritgan yutuq va marralari bilan tengdoshlariga ibrat bo‘layotgan 200 nafarga yaqin yoshlar va jamoatchilik vakillari ishtirok etmoqda.
Yoshlar ishlari agentligi viloyat boshqarmasi boshlig‘i Oybek Yo‘ldoshevning ma’lum qilishicha, forum doirasida karantin qoidalariga to‘liq rioya qilingan holda viloyatdagi 64 ta sektor hududida 250 ga yaqin turli ko‘ngilochar shou-dasturlar, madaniy-ma’rifiy tadbirlar, sport musobaqalari, tanlovlar, yosh tadbirkor va hunarmandlarning ko‘rgazmalarini o‘tkazish rejalashtirilgan.
“Daryo” muxbirining qayd etishicha, o‘tkazilayotgan sport bellashuvlarida viloyatdagi mavjud shahar va tuman hokimlari, sektor rahbarlari ham faol ishtirok etib, o‘zlarining mahoratini namoyon etgan. Jumladan, Asaka tumani hokimi Mansur Alixonov, sektor rahbarlari bilan birgalikda o‘zbek jang san’ati bo‘yicha viloyat birinchiligi musobaqasining ochilish marosimida ishtirok etib, sportchilarga ushbu yo‘nalish bo‘yicha master-klass o‘tib bergan.
Paxtaobod tumani hokimi Mahmud Bozorov esa kikboksing bo‘yicha viloyat hokimi kubogi uchun kurashda birinchilardan bo‘lib ringga ko‘tarilib, asakalik raqibi bilan jang o‘tkazgan.
Marhamat tumani hokimi Bobirbek Yo‘ldoshev esa Erkin Vohidov nomidagi shaxmat maktabida yoshlar bilan dona surib, aql charxi bahsida o‘zini sinab ko‘rgan. Bundan tashqari tuman hokimi voleybol musobaqalarida ham ishtirok etgan.
Andijon tumanida bo‘lib o‘tgan velopoygachilar bahsini tuman hokimi Abdujabbor Egamberdiyev boshlab bergan bo‘lsa, Jalaquduq tumani hokimi Hikmatillo Latipov ham hamkasblaridan ortda qolmay, futbol maydonida o‘z mahoratini sinovdan o‘tkazgan.
Izoh (0)