Toshkent shahri Yashnobod tumanida o‘smir yigit 61 yoshli ayolning pul va buyumlarini o‘g‘irlab ketdi, deya xabar qilmoqda Tergov departamenti.
Qayd etilishicha, 2021-yilning 10-may kuni soat 18:30 larda noma’lum shaxs Yashnobod tumani Baxt ko‘li 1-berk ko‘chasi hududidan o‘tib ketayotgan 61 yoshli I.Z. ismli ayolning qo‘lida bo‘lgan narxi 150 000 so‘mlik charmdan ishlangan ayollar sumkasi, sumka ichidagi narxi 1 000 000 so‘mlik Samsung rusumli telefon apparatini hamda 1 200 000 so‘m pullarini ochiqdan ochiq talon-toroj qilib, hodisa joyidan yashiringan.
Olib borilgan tezkor-qidiruv harakatlari jarayonida ushbu jinoyatni 11-sinf o‘quvchisi, voyaga yetmagan 17 yoshli Sh.A. sodir etganligi aniqlangan.
Mazkur holat yuzasidan Yashnobod tumani bo‘yicha IIO FMB huzuridagi tergov bo‘linmasi tomonidan Sh.A.ga nisbatan Jinoyat kodeksining 166-moddasi (talonchilik) bilan jinoyat ishi qo‘zg‘atilib, u gumon qilinuvchi tariqasida jalb qilingan.
Hozirda tergov davom etmoqda.
Bundan avval Andijonda ikki shaxsga zo‘rlik ishlatib, puli va telefonini olib qo‘ygan ayol ushlangani, Buxoroda o‘ziga notanish fuqaroga spirtli ichimlik ichishni taklif qilib, uni do‘pposlagan va to‘nagan shaxsga sud hukmi o‘qilgani hamda Farg‘onada mahalladagi tanishining oldiga kelgan yigitni qizlarning oldiga kelganlikda ayblab, urib, “yechintirib ketgan”lar qo‘lga olingani haqida xabar berilgandi.
Izoh (0)