Rossiyaga ketib, 18 yil bedarak yo‘qolgan O‘zbekiston fuqarosi Samara shahridan topildi. Bu haqda Tashqi mehnat migratsiyasi agentligi xabar berdi.
Ma’lum qilinishicha, asli Toshkent shahridan bo‘lgan fuqaro P.K. 2003-yilda ishlash uchun Rossiyaga ketgan. Ma’lum bir vaqtdan keyin salomatligi yomonlashib, insult bo‘lishi natijasida yaqinlari bilan aloqasi uzilgan.
Oradan 18 yil o‘tib, ushbu fuqaro Samara shahridan topildi. Uning shaxsni tasdiqlovchi hujjatsiz, ishsiz, boshpanasiz ko‘chada yashab yurganligi aniqlandi.
Shuningdek, yana bir surxondaryolik fuqaro I.T. Samara shahrida sog‘lig‘i yomonlashib, mehnatga layoqatsiz bo‘lib qolishi va pasportining yo‘qolishi natijasida murakkab vaziyatga tushib qolgani haqida murojaat kelib tushgan.
Ushbu fuqarolarga O‘zbekistonning Qozon shahridagi Bosh konsulxonasi tomonidan “Vatanga qaytish guvohnomasi” rasmiylashtirilib, Xalqaro migratsiya tashkiloti bilan hamkorlikda Qozon—Toshkent aviareysi orqali O‘zbekistonga qaytarilgan.
Ularni Toshkent xalqaro aeroportida Tashqi mehnat migratsiyasi agentligi, Xalqaro migratsiya tashkiloti mas’ul xodimlari va yaqin qarindoshlari kutib olgan.
Avvalroq Rossiyada baxtsiz hodisaga uchragan o‘zbekistonlik ona va bolaga yordam ko‘rsatilgani, Turkiyaning Istanbul, Rossiyaning Novosibirsk va Qozon shaharlarida ishlash maqsadida borib, pandemiya sharoitida moliyaviy qiyin ahvolda qolgan jami 7 nafar fuqaro O‘zbekistonga qaytarilgani haqida xabar berilgan edi. Undan avval esa Rossiyada qiyin ahvolda qolgan 9 nafar, Istanbuldan esa 6 nafar o‘zbekistonlik vatanga qaytarilgandi.
Izoh (0)