Surxondaryo viloyati Qumqo‘rg‘on tumanidagi ombordan katta miqdorda chigit mahsulotlari o‘marib ketilgani aniqlandi, deya xabar bermoqda Tergov departamenti.
Ma’lum qilinishicha, fuqaro 45 yoshli X.A. Qumqo‘rg‘on tumani IIB boshlig‘i nomiga aloqa xati orqali yo‘llagan murojaatida 2021-yilning aprel oyi boshlarida va 1-may kunidan 2-may kuniga o‘tar kechasi unga tegishli Qumqo‘rg‘on tumanida joylashgan MChJ omborxonasida saqlanayotgan hosil uchun tarqatilishidan qolgan jami 12 929 kilogramm dorilangan chigit mahsulotlari noma’lum shaxslar tomonidan o‘g‘irlab ketilganligini ma’lum qilgan.
Olib borilgan tergovga qadar tekshiruv harakatlari davomida ushbu jinoyatni Qumqo‘rg‘on tumanida yashovchi fuqarolar 29 yoshli M.Sh., 33 yoshli T.O., X.A. va 27 yoshli X.U. sodir etganligi aniqlanib, hujjatsiz paxta chigitini ajratish sexi, 67 kilogramm paxta mahsuloti, jami 624 kilogramm dorilangan chigit mahsulotlari ashyoviy dalil tariqasida rasmiylashtirib olingan.
Mazkur holat yuzasidan Qumqo‘rg‘on tumani IIB huzuridagi tergov bo‘limi tomonidan Jinoyat kodeksining 169-modda 2-qismi “v, g” bandlari (o‘g‘rilik) bilan jinoyat ishi qo‘zg‘atilgan.
Hozirda tergov harakatlari olib borilmoqda.
Bundan avval Yunusobodda ikki nafar talaba o‘zganing xonadonidan 60 ming dollarlik avtomobil ehtiyot qismlarini o‘g‘irlab ketgani, Toshkentga ketayotgan taksi haydovchisiga tosh bilan hujum qilib, yonidagi 4800 dollarni olib qochgan shaxs qo‘lga olingani hamda Toshkentda avval ham o‘g‘rilik uchun sudlangan shaxs 7,5 million so‘mlik tilla taqinchoqlarni o‘margani haqida xabar berilgandi.
Izoh (0)