Тошкент шаҳри Яшнобод туманида ўсмир йигит 61 ёшли аёлнинг пул ва буюмларини ўғирлаб кетди, дея хабар қилмоқда Тергов департаменти.
Қайд этилишича, 2021 йилнинг 10 май куни соат 18:30 ларда номаълум шахс Яшнобод тумани Бахт кўли 1-берк кўчаси ҳудудидан ўтиб кетаётган 61 ёшли И.З. исмли аёлнинг қўлида бўлган нархи 150 000 сўмлик чармдан ишланган аёллар сумкаси, сумка ичидаги нархи 1 000 000 сўмлик Samsung русумли телефон аппаратини ҳамда 1 200 000 сўм пулларини очиқдан очиқ талон-торож қилиб, ҳодиса жойидан яширинган.
Олиб борилган тезкор-қидирув ҳаракатлари жараёнида ушбу жиноятни 11-синф ўқувчиси, вояга етмаган 17 ёшли Ш.А. содир этганлиги аниқланган.
Мазкур ҳолат юзасидан Яшнобод тумани бўйича ИИО ФМБ ҳузуридаги тергов бўлинмаси томонидан Ш.А.га нисбатан Жиноят кодексининг 166-моддаси (талончилик) билан жиноят иши қўзғатилиб, у гумон қилинувчи тариқасида жалб қилинган.
Ҳозирда тергов давом этмоқда.
Бундан аввал Андижонда икки шахсга зўрлик ишлатиб, пули ва телефонини олиб қўйган аёл ушлангани, Бухорода ўзига нотаниш фуқарога спиртли ичимлик ичишни таклиф қилиб, уни дўппослаган ва тўнаган шахсга суд ҳукми ўқилгани ҳамда Фарғонада маҳалладаги танишининг олдига келган йигитни қизларнинг олдига келганликда айблаб, уриб, «ечинтириб кетган»лар қўлга олингани ҳақида хабар берилганди.
Изоҳ (0)