Ijtimoiy tarmoqlarda 14-may kuni Qibray tumanida 9 gektarlik yerda pishgan qulupnay buldozer bilan buzib tashlangani aytilgan xabar va holat aks etgan video tarqaldi.
Foto: Videodan kadr
Unda dehqonlarning bunga qarshilik qilayotgani, voqea joyida ichki ishlar organlari ham borligini ko‘rish mumkin.
Holat yuzasidan Toshkent viloyati IIB matbuot kotibi Bobur To‘laganov izoh berib, dalaning buzilishiga ichki ishlar xodimlari aloqador emasligini bildirdi.
“Ushbu video yuzasidan ko‘pchilik ichki ishlar organlari xodimlariga nisbatan salbiy fikrlar qoldirishmoqda. Shuni qayd etish kerak, yerdagi hosilni terib olish, o‘rib tashlash yoki buzdirish ishlariga ichki ishlar xodimlari aloqador emas. Jarayonda ishtirok etgan IIO xodimlari faqatgina kelib chiqqan janjalni to‘xtatish, jamoat tartibini saqlash kabi xizmat burchini bajargan”, — degan u.
Qibray tumani hokimligi matbuot xizmati videolavha bo‘yicha tegishli mas’ullar tomonidan o‘rganish ishlari olib borilayotgani va natijalar bo‘yicha batafsil ma’lumot berilishini ma’lum qildi.
